Rəqəmsal İnkişaf və Nəqliyyat Nazirliyinin bir qrup əməkdaşı üçün hesabatlılıq və şəffaflığa dair növbəti təlim keçirilib. Tədbir “Korrupsiyaya qarşı mübarizənin gücləndirilməsinə dair 2022–2026-cı illər üçün Milli Fəaliyyət Planı”nın icrası çərçivəsində təşkil olunub və hesabatlılıq və şəffaflıq prinsiplərinin tətbiqi ilə bağlı hüquqi əsaslar əsas müzakirə mövzusu olub.
Rəqəmsal inkişaf və nəqliyyat nazirinin müşaviri Rəşad Bayramov bildirib ki, hesabatlılıq və şəffaflıq effektiv idarəetmə üçün vacib amillərdəndir və şəffaf idarəetmənin təşviqi nazirliyin fəaliyyətində prioritetdir.
“Konstitusiya” Araşdırmalar Fondunun prezidenti Əliməmməd Nuriyev strateji sənədlər və fəaliyyət planları barədə danışaraq qanunvericilik tələbləri və mümkün hüquqpozma hallarının qarşısının alınması üçün qabaqlayıcı tədbirlərdən bəhs edib.
“Prioritet” Sosial İqtisadi Araşdırmalar Mərkəzi İctimai Birliyinin sədri Zaur İbrahimli hesabatlılıq və şəffaflığın təşkilatların fəaliyyətində etimadın formalaşması və məsuliyyətin artırılması baxımından əhəmiyyətinə dair nümunələr təqdim edib.
Təlim iştirakçıların sualları ilə yekunlaşıb; tədbir qeyri-hökumət təşkilatları ilə əməkdaşlıq proqramı çərçivəsində reallaşdırılıb.
Mənbə: az.trend.az

