Heydər Əliyev Fondunun vitse‑prezidenti və IDEA İctimai Birliyinin rəhbəri Leyla Əliyeva noyabrın 12‑də COP31 çərçivəsində BMT‑nin Məskunlaşma Proqramının Şərqi Avropa və Mərkəzi Asiya Regional Ofisinin direktoru Erfan Ali ilə görüşüb.
Görüşdə Azərbaycanın dayanıqlı şəhərsalma və ətraf mühitin qorunması sahəsində atdığı addımlar barədə məlumat verilib. IDEA İctimai Birliyinin şəhər mühitinin yaxşılaşdırılması, yaşıl zonaların genişləndirilməsi və ekoloji maarifləndirməyə yönəlmiş fəaliyyətləri təqdim olunub.
Müzakirələr zamanı sahilyanı şəhərlərin iqlimə davamlılığının möhkəmləndirilməsi, risklərin qiymətləndirilməsi və şəhərsalma proseslərində ekoloji amillərin nəzərə alınmasının vacibliyi vurğulanıb.
IDEA İctimai Birliyi ilə UN‑Habitat arasında yaşıllaşdırma, dayanıqlı yaşayış mühitlərinin yaradılması və iqlimə uyğunlaşma sahələrində əməkdaşlıq imkanları müzakirə edilib və birgə təşəbbüslərin həyata keçirilməsi perspektivlərinə toxunulub.
Eyni gündə Leyla Əliyeva COP31 çərçivəsində Ümumdünya Meteorologiya Təşkilatının Baş katibi Celeste Saulo ilə görüş keçirib. Görüşdə iqlim təsirlərinin qiymətləndirilməsi, meteoroloji müşahidələrin yaxşılaşdırılması və elmi məlumatların istifadəsi məsələləri ətrafında fikir mübadiləsi aparılıb.
Müzakirələrdə Xəzər dənizinin səviyyəsindəki dəyişikliklərin elmi araşdırılması və bu sahədə beynəlxalq əməkdaşlığın genişləndirilməsi, iqlim monitorinqinin gücləndirilməsi və erkən xəbərdarlıq sistemlərinin inkişafı üzrə perspektivlər müzakirə olunub.
Həmçinin IDEA İctimai Birliyi ilə ÜMT arasında gənc tədqiqatçıların iqlim sahəsində təlimi, beynəlxalq təcrübə mübadiləsi və müvafiq təlim proqramlarının təşkili imkanları barədə fikir mübadiləsi aparılıb.
Mənbə: az.trend.az