2027-ci il üçün Azərbaycanda yaşayış minimumunun ölkə üzrə 314 manat səviyyəsində müəyyən edilməsi nəzərdə tutulur. Bu göstərici “Azərbaycan Respublikasının 2027-ci il dövlət büdcəsi haqqında” qanun layihəsində Milli Məclisin İqtisadi siyasət, sənaye və sahibkarlıq komitəsində müzakirə edilib.
Layihəyə əsasən, gələn il əmək qabiliyyətli əhali üçün yaşayış minimumu 334 manat, pensiyaçılar üçün 258 manat, uşaqlar üçün isə 274 manat nəzərdə tutulur. Yeni məbləğlərin 2027-ci il yanvarın 1-dən tətbiqi planlaşdırılır.
2026-cı ildə yaşayış minimumu ölkə üzrə 300 manat, əmək qabiliyyətli əhali üçün 317 manat, pensiyaçılar üçün 245 manat, uşaqlar üçün 260 manat müəyyən edilib.
Layihədə 2027-ci il üçün təklif edilən məbləğlərə görə ölkə üzrə 14 manat (4,7%), əmək qabiliyyətli əhali üçün 17 manat (5,4%), pensiyaçılar üçün 13 manat (5,3%), uşaqlar üçün 14 manat (5,4%) artım nəzərdə tutulur.
Mənbə: az.trend.az