Azərbaycan Respublikası Media və Yayım Şurasının təşəbbüsü ilə 2026-cı ilin noyabr ayını əhatə edən “Rəqəmsal Media Ayı” çərçivəsində tədbirlər başlayıb, bu barədə Şuradan məlumat verilib.
Təşəbbüsün əsas məqsədi cəmiyyətdə media savadlılığının artırılması, müasir informasiya mühitinə dair bilik və bacarıqların təkmilləşdirilməsi, etibarlı məzmun yaradılmasının təşviqi və gənclərin bu sahədə inkişafına dəstək göstərilməsidir. Həmçinin məlumat verilib ki, təşəbbüs yeni texnologiyaların imkanları barədə məlumatlılığı artırmaq və rəqəmsal platformalarda təhlükəsizlik mədəniyyətinin gücləndirilməsinə xidmət edir.
Təlim proqramının ilk günü rəqəmsal media trendləri, platforma alqoritmləri, şəxsi brendin formalaşdırılması və auditoriya ilə qarşılıqlı əlaqənin qurulması mövzularına həsr edilib.
Rəqəmsal marketinq və süni intellekt üzrə mütəxəssis Cəfər Nəcəfov “Rəqəmsal media trendləri və platforma alqoritmləri” mövzusunda çıxış edib. Kontent yaradıcısı Pərviz Sadıqov “Şəxsi brend və auditoriya ilə qarşılıqlı əlaqə: rəqəmsal kontent strategiyaları” mövzusunda təqdimatla çıxış edib.
Təlim proqramı mövzular ətrafında müzakirələr və sual-cavab sessiyaları ilə davam edib. Bildirilib ki, noyabr ayı ərzində müxtəlif hədəf qrupları üçün maarifləndirmə və inkişaf proqramlarının, praktiki təlimlərin, seminarların, şəbəkələşmə görüşlərinin və media kampaniyalarının təşkili nəzərdə tutulur.
Mənbə: az.trend.az