Noyabrın 2-də Yeni Azərbaycan Partiyasının Mərkəzi Aparatının və Nərimanov rayon təşkilatının birgə təşkilatçılığı ilə 8 Noyabr – Zəfər Gününə həsr olunmuş tədbir keçirilib. Tədbir iştirakçıları Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəxslərin xatirəsini bir dəqiqəlik sükutla yad edib və dövlət himni səsləndirilib.
Tədbirdə çıxış edən YAP Mərkəzi Aparatının rəhbəri Tahir Budaqov bildirib ki, Zəfər tarixi Azərbaycanın milli birliyinin, dövlətçilik iradəsinin və uzunmüddətli inkişaf strategiyasının nəticəsidir. O şəhidlərin xatirəsinin uca tutulduğunu, qazilərə və şəhid ailələrinə göstərilən diqqətin dövlət sosial siyasətinin prioritetlərindən olduğunu vurğulayıb.
Budaqov Ulu Öndər Heydər Əliyevin dövlətçilik strategiyasının müasir Azərbaycanın inkişafında mühüm rol oynadığını qeyd edib və Prezident İlham Əliyevin rəhbərliyi ilə həyata keçirilən siyasətin ölkənin iqtisadi, hərbi və siyasi gücünün möhkəmlənməsinə töhfə verdiyini söyləyib.
Çıxışlarda işğaldan azad edilmiş torpaqların bərpası, Böyük Qayıdış prosesinin həyata keçirilməsi və bu ərazilərdə insanların həyatının yenidən qurulmasının vacibliyi qeyd edilib. Eyni zamanda, gənclərin vətənpərvərlik ruhunda tərbiyə olunmasının, dövlət siyasətinin və əldə olunan uğurların ictimaiyyətə düzgün çatdırılmasının əhəmiyyəti vurğulanıb.
Tədbirdə həmçinin Zəfər tarixinin təbliği, şəhidlərin xatirəsinə ehtiramın saxlanılması və qazilərə göstərilən diqqətin davam etdirilməsinin vacibliyi bildirilmiş, Yeni Azərbaycan Partiyasının ölkənin inkişafında rolunun və qarşıda duran vəzifələrin önəmi qeyd olunub.
Mənbə: az.trend.az