2024-cü il 24 oktyabr tarixində Azərbaycan Prezidenti İlham Əliyev Kazan şəhərində keçirilən XVI BRICS Sammitində iştirak edərək ölkənin çoxtərəfli diplomatiya və regional əməkdaşlıq siyasətini vurğuladı. Sammitdə çıxışında Prezident İlham Əliyev Azərbaycanın beynəlxalq münasibətlərdəki fəal iştirakını, logistika və nəqliyyat dəhlizləri vasitəsilə Avrasiya üçün oynadığı vacib rolu və Ermənistanla aparılan sülh danışıqları prosesini önə çıxardı.
Prezident İlham Əliyev çıxışında Azərbaycanın beynəlxalq münasibətlərdə çoxtərəflilik prinsipinə sadiqliyini vurğuladı. Bu yanaşma 2020-2023-cü illərdə Azərbaycanın Qoşulmama Hərəkatına sədrlik etdiyi dövrdə özünü aydın şəkildə göstərib. O bildirdi ki, Azərbaycanın fəal sədrlik dövründə təşkilat beynəlxalq arenada mövqelərini gücləndirərək qlobal idarəetmədə mühüm addımlar atıb. Hazırda ölkə Asiyada Qarşılıqlı Fəaliyyət və Etimad Tədbirləri üzrə Müşavirəyə (CICA) də rəhbərlik edir ki, bu da onun çoxşaxəli diplomatik təcrübəsini daha da zənginləşdirir.
Azərbaycanın coğrafi mövqeyi və müasir infrastruktur layihələri ölkəni “Şərq-Qərb” və “Şimal-Cənub” nəqliyyat dəhlizlərinin əsas mərkəzlərindən birinə çevirib. Prezident İlham Əliyev çıxışında bu nəqliyyat yollarının Azərbaycan ərazisindəki seqmentlərinin uğurla fəaliyyət göstərdiyini vurğuladı. Ölkə ərazisindən keçən yüklərin həcminin artması səbəbindən, bu dəhlizlərin ötürücülük qabiliyyətinin genişləndirilməsi üçün əlavə investisiyalar ayrıldığını qeyd etdi. Bu təşəbbüs Azərbaycanın Avrasiya məkanında mühüm logistika mərkəzinə çevrilmək strategiyasının bir hissəsidir.
Noyabr ayında Bakı şəhəri 200-dən çox ölkənin qatılacağı COP29 iqlim konfransına ev sahibliyi edəcək. Prezident İlham Əliyev bu tədbirin Azərbaycanda keçirilməsini ölkənin beynəlxalq arenadakı nüfuzuna və onun iqlim dəyişikliyi ilə mübarizə sahəsində fəal siyasətinə verilən dəstək kimi dəyərləndirdi. Konfrans, Azərbaycanın Qlobal Cənub və Qlobal Şimal arasında iqlim əməkdaşlığının inkişafına töhfə vermək istiqamətində yeni imkanlar açır.
Sammit çərçivəsində Prezident Əliyev və Ermənistanın Baş naziri Nikol Paşinyan arasında ikitərəfli görüş keçirildi. Görüş zamanı tərəflər sülh sazişi, sərhədlərin delimitasiyası və demarkasiyası ilə bağlı müzakirələr aparıblar. Hər iki ölkənin xarici işlər nazirlərinə sülh sazişi üzərində işləri tez bir zamanda yekunlaşdırmaq tapşırığı verilib. Bu addım regionda davamlı sülh və sabitlik üçün mühüm əhəmiyyət daşıyır.
BRICS Sammiti qlobal siyasətdə inkişaf etməkdə olan ölkələrin mövqelərini gücləndirmək məqsədini daşıyır. BRICS-in geosiyasi məqsədi dünya iqtisadiyyatında və idarəetməsində daha ədalətli nizam yaratmaqdır. Bu blok, ABŞ dollarının dominantlığını azaltmaq və beynəlxalq münasibətləri demokratikləşdirmək istiqamətində fəaliyyət göstərir.
Prezident İlham Əliyevin çıxışı Azərbaycanın qlobal əməkdaşlıq və sülh təşəbbüslərində fəal rol oynadığını bir daha nümayiş etdirdi. Nəqliyyat layihələri və beynəlxalq konfranslara ev sahibliyi etmək təşəbbüsləri Azərbaycanın regionda və dünyada vacib bir oyunçuya çevrildiyini göstərir. BRICS+ formatında belə platformalarda iştirak, ölkənin xarici siyasətini daha da möhkəmləndirir və yeni imkanlar yaradır.
Həliməxanım Ələkbərova
Suraxanı rayonu, N.Əliyev adına 282 nömrəli tam orta məktəbin təlim-tərbiyə işləri üzrə direktor müavini
