Milli Məclisdə müzakirə edilən qanun layihəsinə əsasən, pulsuz hüquqi yardımın göstərilməsi qaydalarının pozulmasına görə inzibati cərimələr nəzərdə tutulur: fiziki şəxslər üçün 100–200 manat, vəzifəli şəxslər üçün 200–300 manat, hüquqi şəxslər üçün 300–400 manat arasında cərimə tətbiq edilə bilər.
Qanun layihəsi Milli Məclisin Hüquq siyasəti və dövlət quruculuğu komitəsinin oktyabrın 27-də keçirilən iclasında müzakirə olunub və İnzibati Xətalar Məcəlləsində dəyişiklik edilməsi haqqında təklifləri özündə əks etdirir.
Layihəyə görə, pulsuz hüquqi yardım ilkin və peşəkar yardım formasında göstəriləcək. İlkin yardım şəxslərin hüquq və vəzifələri barədə məlumatlandırılma, ərizə və şikayətlərin hazırlanmasına köməklik və peşəkar yardıma daxil olmayan digər dəstəyi əhatə edir.
Peşəkar hüquqi yardım cinayət işlərində müdafiə, zərərçəkmiş və xüsusi ittihamçının təmsilçiliyi, insan alveri və cinsi zorakılıq qurbanlarına, məişət zorakılığı mağdurlarına və inzibati qaydada tutulmuş şəxslərə yardım, həmçinin mülki və inzibati məhkəmə təmsilçiliyi və Konstitusiya Məhkəməsində şikayətlərin təmsilçiliyini nəzərdə tutur.
Layihədə pulsuz hüquqi yardımın dövlət büdcəsinin vəsaiti hesabına göstərilməsi və “pro bono” xidməti anlayışının ayrıca müəyyən edilməsi nəzərdə tutulur; sənədə görə vəkillər ildə ən azı 30 saat ictimai fayda məqsədilə ödənişsiz hüquqi yardım göstərməlidirlər.
Mənbə: az.trend.az