“İstedadları Tanıyaq və Tanıdaq” İctimai Birliyinin 7 yaşı münasibətilə “Dostluq körpüsü” adlı konsert tədbir keçirildi.
RUBİN.AZ xəbər verir ki, ilk öncə Azərbaycan Respublikasının dövlət Himni səsləndirildi. Müstəqil Azərbaycanın ərazi bütövlüyü uğrunda canından keçən şəhidlərimizin və Azərbaycanın qurucusu Heydər Əliyevin əziz xatirəsini bir dəqiqəlik sükutla yad edildi.
Tədbirdə şəhid və qazi ailələri, millət vəkilləri, yazarlar, jurnalistlər, QHT sədrləri , sənətçilər , ictimaiyyət nümayəndələri, istedadlı uşaq və gənclər, fiziki məhdudiyyətli uşaqlar, onların ailələri iştirak etdi.
Maraqlı çıxışlarla yaddaqalan tədbirin sonunda “İstedadları Tanıyaq və Tanıdaq” İctimai Birliyinin 30 nəfər üzvünə üzvlük vəsiqələri, 30 nəfərə isə diplom və hədiyyələr təqdim olundu.
Çay süfrəsi ətrafında davam edən tədbirin sonunda təşkilat sədri Vüsalə Sadıqova (Qələndərli) tədbirin təşkilində dəstəyə görə Milan Hospitalın direktoru Xuraman Muradovaya, Yeniproqnoz.az saytının rəhbəri Xanım Bağırlıya, əməkdar artist Nərgiz Əliyevaya, təşkilatın könüllü üzvlərinə və valideynlərə təşəkkür edib.
Qeyd edək ki “İstedadları tanıyaq və tanıdaq” İB tərəfindən “Dostluq Körpüsü” adlı layihənin davamlı olaraq icra olunmasında məqsəd əlillərin və sağlamlıq imkanları məhdud uşaqların, valideyn himayəsindən məhrum olmuş uşaqların da cəmiyyətin digər üzvləri kimi bərabərhüquqlü və cəmiyyətə tam inteqrasiya olunmalarının təmin edilməsidir. Əlilliyi olan və sağlamlıq imkanları məhdud uşaqlarla sağlam uşaqlar və gənclər arasında yaranan dostluq körpüsü, həmçinin dövlətin diqqəti, ziyalıların, sənətçilərin dəstəyi onların özgüvənlərinin artmasına səbəb olur. Bu cür tədbirlər birlik tərəfindən silsilə şəkildə Bakı və regionlarda davam etdiriləcək.
