Xarici işlər naziri Ararat Mirzoyan Ermənistanla Türkiyə arasında münasibətlərin normallaşması prosesinə toxunub.
Modern.az xəbər verir ki, nazir İctimai Televiziyada çıxış edərkən deyib:
“Son görüş Antalyada oldu, lakin bundan sonra əlaqələr davam edir”.
“Antaliyada biz bir sıra məsələlərdə daha geniş anlaşma əldə etdik: ikimiz də Türkiyə ilə Ermənistan arasında quru sərhədinin üçüncü ölkə vətəndaşları və diplomatik pasportu olan şəxslər üçün açılmasına sadiqliyimizi bir daha təsdiqlədik”, – Mirzoyan əlavə edib.
O, dediklərinin gerçəkləşəcəyinə ümid etdiyini bildirib.
“Ümid edirəm ki, biz razılaşmanın həyata keçirilməsini yaxın gələcəkdə görəcəyik”, – Mirzoyan bildirib.
Ararat Mirzoyanın sözlərinə görə, tərəflər daha bir neçə məsələni müzakirə edirlər.
“Cənab Rubinyan və cənab Kılıç təmasdadır, onların görüşü təşkil olunacaq və biz bir az da irəli gedə biləcəyik”, – o bildirib.
Qeyd edək ki, bir neçə ay əvvəl Antalyada keçirilən diplomatiya forumu zamanı Ermənistan-Türkiyə münasibətlərinin normallaşması prosesində Türkiyənin xüsusi nümayəndəsi Serdar Kılıç İrəvanda xüsusi nümayəndələrin görüşünün keçirilməsini təklif etmişdi.
Ermənistanın xüsusi nümayəndəsi Ruben Rubinyan dərhal bildirmişdi ki, İrəvan bu təklifə cavab verəcək.
Xüsusi elçilər Ruben Rubinyan və Serdar Kılıç sonuncu dəfə 2022-ci il iyunun 1-də Vyanada görüşüblər, bu, onların dördüncü rəsmi görüşü olub. Bu görüşdə tərəflər quru sərhədinin tez bir zamanda üçüncü ölkə vətəndaşları üçün açılması barədə razılığa gəliblər. Lakin bu məsələnin həyata keçirilməsində heç bir irəliləyiş yoxdur.
