Binəqədi şosesinin Mehdiabad yolu ilə kəsişməsindən Zəngəzur küçəsi ilə kəsişməsinə qədər olan hissədə aparılacaq təmir işləri ilə bağlı 16 oktyabr saat 23:00-dan nəqliyyat vasitələrinin hərəkətinə məhdudiyyət tətbiq ediləcək.
Azərbaycan Yerüstü Nəqliyyat Agentliyinin bildirməsinə görə, məhdudiyyətlər səbəbindən 100, 108A, 108B, 123, 133, 147, 165 və 179 nömrəli müntəzəm marşrutların hərəkət sxemləri müvəqqəti qaydada dəyişdiriləcək.
100, 108B, 123, 133, 165 və 179 nömrəli marşrutların həm metronun “Azadlıq prospekti” stansiyası istiqamətində, həm də əks yöndə hərəkəti Biney Qazi, Gülməmməd Ramazanov, 10 May, Araz, Ozan, Telman Kəlbiyev və Zəngəzur küçələri ilə Binəqədi şosesi üzərindən, daha sonra əvvəlki sxemə uyğun olaraq təşkil ediləcək.
108A və 147 nömrəli marşrutların “Azadlıq prospekti” stansiyası istiqamətində hərəkəti 28 May, Məmməd Araz və 1-ci Göl kənarı küçələri, Ziya Bünyadov və Azadlıq prospektləri, həmçinin Çingiz Aytmatov küçəsi üzrə; əks istiqamətdə isə Çingiz Aytmatov, Şövkət Məmmədova və Əcəmi Naxçıvani küçələri, Atatürk və Ziya Bünyadov prospektləri, 1-ci Göl kənarı, Məmməd Araz və 28 May küçələri vasitəsilə təşkil olunacaq.
Mənbə: az.trend.az