Ermənistanın xarici işlər naziri Ararat Mirzoyan Bakı və İrəvan arasında anklav və eksklavların mübadiləsi ehtimalını istisna etməyib. Bu barədə o, ATƏT-in fəaliyyətdə olan sədri, İsveçrə vitse-prezidenti İnyatsio Kassis ilə birgə mətbuat konfransında jurnalistlərin sualına cavab verərkən bildirib.
Mirzoyan deyib ki, keçmiş anklavlar məsələsinin həlli üçün müxtəlif variantlar mövcuddur və tərəflər məsələyə konstruktiv yanaşırlar. O qeyd edib ki, ölkələrin malik olduğu anklavlardan biri bir ölkənin, digəri isə digər ölkənin tərkibində qala bilər, onlar mübadilə edilə və ya başqa variantlar nəzərdən keçirilə bilər.
Mirzoyanın açıqlamasında konkret model, vaxt cədvəli və ya razılaşma detalları barədə məlumat verilməyib. Mənbədə həmçinin qeyd olunur ki, bundan əvvəl Ermənistanın baş naziri Nikol Paşinyan da sosial media hesabında anklav və eksklavların mübadiləsi ehtimalına toxunub.
Mənbə: az.trend.az