Prezident İlham Əliyev milli radio və televiziya yayımının yubileyi münasibətilə televiziya və radio işçilərinə təbrik ünvanlayıb və Ümummilli Lider Heydər Əliyevin Azərbaycan teleradiosuna göstərdiyi diqqət və qayğını bu sahənin inkişafında xüsusi yer tutan amil kimi qeyd edib.
Təbrikdə bildirilib ki, Heydər Əliyevin rəhbərliyi və dəstəyi ilə milli televiziya və radio yayımının maddi-texniki bazası möhkəmləndirilib, yaradıcı potensial artırılıb və milli-mənəvi dəyərlərin qorunması istiqamətində mühüm addımlar atılıb.
Sənəddə Heydər Əliyevin teleradionu xalqla dövlət arasında mühüm əlaqə vasitəsi, milli birliyin və ideoloji bütövlüyün qorunmasında təsirli platforma kimi qiymətləndirdiyi vurğulanır.
Prezident qeyd edib ki, bu gün Azərbaycan radio və televiziyası müasir texnologiyaların imkanlarından istifadə edərək fəaliyyətini yeni dövrün tələblərinə uyğun qurur və ölkənin uğurlarını, zəngin mədəniyyətini və milli maraqlarını geniş auditoriyaya çatdırır.
Təbrikdə həmçinin bu sahədə çalışan hər bir əməkdaşın zəhmətinin xüsusi təqdirəlayiq olduğu vurğulanıb və milli radio və televiziyanın obyektivlik, peşəkarlıq və milli-mənəvi dəyərlərə sədaqət prinsiplərinə sadiq qalacağına inam ifadə edilib.
Mənbə: az.trend.az

