Milli Məclisdə müzakirə olunan Mülki Prosessual Məcəllədə dəyişiklik layihəsinə əsasən, məhkəmə ekspertizasının iclasdan kənar, yəni tədqiqat obyektinin olduğu yerdə keçirilməsi mümkün olacaq. Ekspert rəy vermək üçün zəruri bildikdə məhkəmədən həmin yerdə tədqiqat aparılmasını xahiş edə biləcək; əgər materialları məhkəməyə və ya ekspertiza idarəsinə gətirmək mümkün deyilsə və ya çətinlik yaradırsa, ekspertiza iclasdan kənar keçirilə bilər.
Qərarda tədqiqat obyektinin fiziki xüsusiyyətlərinə görə elektron qaydada müvafiq orqanın informasiya sisteminə göndərilməsi mümkün olmayan obyektlərin ekspertə poçt vasitəsilə və ya bilavasitə təqdim ediləcəyi göstəriləcək. Belə təqdim olunan obyektlər məhkəmə ekspertizası idarəsinə təqdim edildiyi gündən 1 aydan gec olmayaraq ekspert yazılı rəy verəcək, onu imzası ilə təsdiqləyib dərhal məhkəməyə göndərəcək.
Ekspert rəy verilməsi üçün tədqiqat obyektinin olduğu yerdə tədqiqat aparılmasının zərurətini müəyyən etdikdə, elektron göndəriş mümkün olmayan obyektlər ekspertizasaya təqdim edildiyi vaxtdan 5 gündən gec olmayaraq məhkəməyə vəsatət göndərəcək; vəsatətdə tələb olunan tədqiqat materiallarının dəqiq və tam siyahısı göstəriləcək. Məhkəmə həmin vəsatətə 3 gün müddətində baxacaq və zərurət halında məhkəmə ekspertizası idarəsinin rəhbərinə məlumat verilməklə müddətlər uzadıla biləcək.
Cinayət-Prosessual Məcəllədə dəyişiklik layihəsinə əsasən, hadisə yerində və ya tədqiqat obyektinin olduğu yerdə tədqiqat aparılan zaman müstəntiq tədqiqatın aparılmasını və müvafiq şəxslərin həmin əraziyə daxil olmasını təmin edəcək. Məhkəmə baxışı zamanı təyin edilən ekspertizanı aparan zaman isə məhkəmə tədqiqatın aparılmasını və şəxslərin həmin əraziyə daxil olmasını təmin edəcək.
Ekspert rəylərinin elektron qaydada müvafiq orqanın informasiya sistemi vasitəsilə göndərildiyi hallarda rəy təkmil sertifikatlı gücləndirilmiş elektron imza ilə təsdiq olunacaq; elektron əlavə edilməyən maddi sübutlar, nümunələr, fotoşəkillər və digər materiallar poçtla və ya bilavasitə təqdim olunmalıdır. Qanun layihəsi birinci oxunuşda qəbul edilib.
Mənbə: az.trend.az