Kreml amerikalı maliyyəçi Cefri Epşteyndən Prezident Vladimir Putinlə görüşmək üçün heç bir təklif almayıb.
APA-nın Moskva bürosu xəbər verir ki, bunu Rusiya Prezidentinin mətbuat katibi Dmitri Peskov RTVI-nın sorğusuna cavab olaraq bildirib.
Qeyd edək ki, Putinin adı Epşteynin sənədlərində, əsasən maliyyəçi ilə həmsöhbətləri arasında mübadilə edilən xəbər məqalələrində dəfələrlə görünür. Epşteynin elektron poçtlarında, həmçinin onun 2011 və 2014-cü illər də daxil olmaqla, bir neçə dəfə Putinlə görüşməyə cəhd etdiyi, lakin səylərinin uğursuz olduğu göstərilir.
Yanvar ayının sonunda ABŞ Ədliyyə Nazirliyi Cefri Epşteyn işi ilə bağlı daha 3 milyon səhifə sənəd, eləcə də 2000-dən çox video və 180 min foto yayımlayıb. Bəzi materiallar, o cümlədən qurbanların şəxsi məlumatları redaktə edilib.
