Prezident İlham Əliyevin gənclər siyasətinin nüvəsini ölkənin iqtisadi potensialının gənc nəslin inkişafına yönəldilməsi təşkil edir. Dövlət başçısının “Biz neft kapitalını insan kapitalına çevirməliyik” şüarı gənclər strategiyasının əsas hərəkətverici qüvvəsidir. Bu strategiya sadəcə sosial dəstək tədbirləri deyil, gəncləri idarəedici subyektə, innovasiya mənbəyinə və dövlətçiliyin əsas müdafiəçisinə çevirmək məqsədi güdür.
Müasir gənclər strategiyasının ən parlaq səhifəsi təhsil sahəsindəki islahatlardır. Prezidentin sərəncamları ilə minlərlə Azərbaycan gənci dünyanın ən nüfuzlu universitetlərində dövlət hesabına təhsil alıb. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” və hazırda icra olunan yeni proqramlar ölkəyə tamamilə fərqli təfəkkürlü, beynəlxalq təcrübəyə malik bir mütəxəssis ordusu qazandırıb.
Prezident İlham Əliyev gənclərin elmi potensialına xüsusi önəm verir. Gənclər üçün Prezident Mükafatının təsis edilməsi elm və mədəniyyət sahəsində fərqlənən gənclərin əməyinin ən yüksək səviyyədə qiymətləndirilməsidir.
Prezident İlham Əliyevin strategiyasının ən inqilabi addımlarından biri kadr islahatlarıdır. Son illərdə dövlət idarəçiliyində, nazirliklərdə, icra strukturlarında və diplomatik korpusda gənclərə geniş yer verilir. Bu, dövlət başçısının gənclərə olan sonsuz etimadının göstəricisidir. “Yüksəliş” müsabiqəsi kimi layihələr vasitəsilə intellektual səviyyəsi və idarəçilik qabiliyyəti olan gənclər birbaşa rəhbər vəzifələrə cəlb olunur. Gənclər artıq qərarların qəbul edilməsində iştirak edən aparıcı qüvvədir.
Prezident İlham Əliyevin təşəbbüsü ilə Azərbaycanda geniş vüsət alan könüllülük hərəkatı gənclərin sosial məsuliyyət hissini artırıb. Könüllülük sadəcə təcrübə toplamaq deyil, həm də dövlətə və xalqa təmənnasız xidmət məktəbidir. 2020-ci ilin “Könüllülər İli” elan edilməsi gənclərin cəmiyyətdəki fəallığına verilən ali qiymət idi. Bu hərəkat gəncləri dövlət aparatına yaxınlaşdırır və onlarda idarəçilik vərdişləri formalaşdırır.
Prezident İlham Əliyevin gənclər siyasətinin ən mühüm və tarixi nəticəsi 44 günlük Vətən müharibəsində qazanılan şanlı Qələbədir. Torpaqlarımızı azad edən əsgər və zabitlərin mütləq əksəriyyəti məhz İlham Əliyevin hakimiyyəti dövründə yetişən, onun gənclər strategiyasının və vətənpərvərlik tərbiyəsinin məhsulu olan gənclərdir.
Dövlət başçısının qeyd etdiyi kimi: “Bu qələbəni qazanan bizim gənc nəslimizdir. Onlar milli ruhda, vətənpərvərlik ruhunda tərbiyə olunublar.” Müharibə dövründə həm döyüş meydanında, həm də internet üzərindən aparılan informasiya müharibəsində gənclərin göstərdiyi fədakarlıq bu strategiyanın nə dərəcədə düzgün qurulduğunu sübut etdi.
Gənclərin rifahı strategiyanın ayrılmaz hissəsidir. “Güzəştli mənzil” layihəsi vasitəsilə yüzlərlə gənc ailə mənzil sahibi olub. Gənclər Fondunun təqdim etdiyi qrantlar gənclərin kiçik və orta sahibkarlıq fəaliyyətinə başlamasına, öz ideyalarını biznesə çevirməsinə dəstək verir. Bu, gənclərin iqtisadi müstəqilliyini təmin edən mühüm amildir.
Prezident İlham Əliyevin müasir gənclər strategiyası Azərbaycanın gələcəyini sığortalayan bir layihədir. Bu siyasət sayəsində bu gün Azərbaycan gənci beynəlxalq tribunalardan sərbəst çıxış edir, müasir texnologiyaları idarə edir və dövlətinin maraqlarını hər yerdə ləyaqətlə müdafiə edir. “Mən gənclərə inanıram və onlara güvənirəm” deyən İlham Əliyevin rəhbərliyi ilə Azərbaycan gəncliyi müstəqil dövlətimizi daha uca zirvələrə daşımağa hazırdır. Bu günün qalib gəncliyi sabahın qüdrətli Azərbaycanının ən böyük qurucusu olacaqdır.
Rüstəmova Leyli
Suraxnı rayonu, 315 nömrəli tam orta məktəbin direktoru
About the Author
