Azərbaycançılıq məfkurəsi xalqımızın tarix boyu süzülüb gələn milli-mənəvi dəyərlərinin müasir dövlətçilik maraqları ilə sintezidir. Ulu Öndər Heydər Əliyev Azərbaycançılıq ideyasını milli birliyin təməl şərti kimi irəli sürmüşdür. O, vurğulayırdı ki, milliyyətindən, dinindən və siyasi baxışından asılı olmayaraq, hər bir kəs özünü azərbaycanlı saymalı və bu adla fəxr etməlidir. Gənclərin bu ruhda tərbiyə olunması, dövlətin sarsılmazlığının yeganə yoludur. 29 dekabr 2000-ci il tarixli müraciətində Ümummilli Lider gənclərə müraciətlə deyirdi: “İstəyirəm ki, hər bir Azərbaycan gənci vətəni Azərbaycanı öz canı qədər sevsin, Azərbaycanın müstəqilliyini qorumaq üçün hər cür qurban verməyə hazır olsun.”
Ulu Öndərin əsasını qoyduğu və Prezident İlham Əliyevin rəhbərliyi ilə son 20 ildə formalaşan vətənpərvərlik siyasəti özünün ən parlaq nəticəsini 2020-ci ilin 44 günlük Vətən müharibəsində göstərdi. Bu müharibə təkcə hərbi gücün deyil, həm də milli ruhun, birliyin və Azərbaycançılıq məfkurəsinin qələbəsi idi.
Prezident İlham Əliyevin vurğuladığı kimi, torpaqlarımızı azad edən gənclər məhz müstəqillik dövründə, bu milli məfkurə ilə yetişən nəsildir. Şuşanı fəth edən, Xudafərinə bayraq sancan, Cəbrayılda, Füzulidə dastan yazan gənclər Heydər Əliyevin arzuladığı o vətənpərvər nəslin nümayəndələri idilər. Onlar sübut etdilər ki, Azərbaycan gənci üçün Vətən müqəddəsdir və onun azadlığı uğrunda canından keçmək ən ali şərəfdir.
Qloballaşma dövründə milli kimliyi qorumaq xüsusi əhəmiyyət kəsb edir. Heydər Əliyev həmişə xəbərdarlıq edirdi ki, gənclər modern texnologiyalardan istifadə etməli, lakin öz milli kimliklərini, adət-ənənələrini heç bir vəchlə itirməməlidirlər. Bu gün Azərbaycan dövləti gənclərin mənəvi həyat tərzi keçirməsini təşviq edir. Zərərli vərdişlərdən uzaq, fiziki cəhətdən sağlam və mənəvi cəhətdən zəngin gənclik Azərbaycanın gələcək inkişafının yeganə təminatıdır.
Azərbaycançılıq məfkurəsinin digər bir mühüm tərəfi onun inklüzivliyidir. Azərbaycan gənci tolerant və multikultural dəyərlərə sahib olan bir şəxsiyyət kimi formalaşır. Ölkəmizdə yaşayan bütün etnik qrupların gəncləri “Azərbaycanlı” kimliyi altında birləşərək ortaq Vətən naminə çalışırlar. Bu birlik informasiya müharibəsində də özünü göstərir. Gənclərimiz müxtəlif dillərdə Azərbaycan həqiqətlərini dünyaya yayır, erməni təbliğatına qarşı elmi və məntiqi arqumentlərlə mübarizə aparırlar. Bu, intellektual vətənpərvərliyin ən yüksək formasıdır.
Vətənpərvərlik və Azərbaycançılıq məfkurəsi gələcəyə doğru gedən yolda bizim kompasımızdır. Ulu Öndər Heydər Əliyevin miras qoyduğu bu ideologiya gənclərimizi təkcə keçmişimizlə deyil, həm də gələcəyimizlə bağlayır. Bu gün Azərbaycan gəncliyi müasir, savadlı və dünya görüşlü olmaqla bərabər, həm də öz dövlətinə, milli dəyərlərinə sadiqdir. Bu sadiqlik Azərbaycanın müstəqilliyinin əbədi, torpaqlarımızın toxunulmaz və xalqımızın birliyinin sarsılmaz olacağının ən böyük zəmanətidir.
Əliyev Dadaş
Suraxanı rayonu, 281 nömrəli tam orta məktəbin direktoru
About the Author
