Qrenlandiyanın təhlükəsizliyini gücləndirmək və ABŞ tərəfindən ilhaqının qarşısını almaq üçün Böyük Britaniya hökuməti adaya qoşun göndərmək istəyir.
APA xəbər verir ki, bu barədə “The Sunday Telegraph” məlumat yayıb. Bildirilib ki, Britaniya bununla bağlı Avropa ölkələri ilə müzakirə aparır.
Nəşrin məlumatına görə, Böyük Britaniya hərbi komandanlığı Qrenlandiyada NATO missiyasının yaradılması planları üzərində işləyir. Qeyd olunur ki, son günlərdə Britaniya rəsmiləri hərbi kontingentlərin yerləşdirilməsi üçün hazırlıqlara başlamaq məqsədilə Fransa və Almaniya da daxil olmaqla, avropalı həmkarları ilə bir sıra görüşlər keçiriblər. Nəşr qeyd edib ki, planlar hələ ilkin mərhələdədir. Londonun NATO missiyasına təkcə şəxsi heyət deyil, həm də hərbi gəmilər və təyyarələrin də töhfə verə biləcəyi gözlənilir.
