Atom Enerjisi üzrə Beynəlxalq Agentlik (AEBA) Zaporojye Atom Elektrik Stansiyasının zədələnmiş 330 kV-luq ehtiyat elektrik ötürücü xətti ərazisində müvəqqəti atəşkəslə bağlı məsləhətləşmələrə başlayıb.
APA xəbər verir ki, bu barədə AEBA-nın baş direktoru Rafael Qrossi məlumat yayıb.
Onun sözlərinə görə, sözügedən xətt yanvarın 2-də hərbi əməliyyatlar nəticəsində zədələnib və istismardan çıxıb. Hazırda Zaporojye AES yalnız bir ədəd işlək 750 kV-luq elektrik xəttindən asılı vəziyyətdədir.
Qrossi bildirib ki, AEBA Ukrayna və Rusiyaya Zaporojye AES-in 330 kV-luq açıq paylayıcı qurğusundan təxminən 10 kilometr radiusda müvəqqəti atəşkəs zonasının yaradılması barədə təklif göndərib.
Məqsəd ukraynalı mütəxəssislərin təmir işlərini təhlükəsiz şəkildə həyata keçirməsinə şərait yaratmaqdır.
AEBA isə qeyd edib ki, dekabrın sonunda əldə edilən ilkin atəşkəs razılaşması təmir işlərinin uğurla aparılmasına imkan verib.
