Azərbaycan Milli Elmlər Akademiyasının 80 illik yubileyində Prezidentimiz cənab İlham Əliyevin proqram xarakterli çıxışı bir İT müəllimi kimi mənim üçün ən vacib istiqamətləri müəyyənləşdirdi. Cənab Prezidentin bəyanatı çox aydın və qətiyyətlidir: texnoloji inkişaf bizim üçün əsas prioritetdir. O, vurğuladı ki, bu, həm ölkənin iqtisadi inkişafını, həm də milli təhlükəsizliyini şərtləndirir. Artıq dünya səhnəsində rəqabət bilik, bacarıq və texnoloji üstünlüklə aparılır. Bizim əsas məqsədimiz bu sahədə qlobal trendləri izləməkdən çox, bu trendləri müəyyənləşdirənlərdən biri olmaqdır.
Bu gün qlobal məkanda ən çox danışılan mövzu süni intellektdir (Sİ). Prezidentimiz də haqlı olaraq qeyd etdi ki, on il əvvəl heç kimin müzakirə etmədiyi Sİ, indi ölkələrin gələcək inkişafının ayrılmaz hissəsidir. Biz Sİ-ni həm inkişaf etdirməli, həm də onu iqtisadiyyatın, texnologiyanın bütün sahələrinə tətbiq etməliyik. Məhz bu sahədə Azərbaycan alimləri, İT mütəxəssisləri dövlətin dəstəyi ilə daha fəal olmalıdırlar.
Texnoloji yeniləşmənin əsas vasitəsi rəqəmsallaşmadır. Rəqəmsallaşma tətbiq olunduğu hər sahədə işin keyfiyyətini və səmərəsini əhəmiyyətli dərəcədə artırır. Hökumət strukturunda “Rəqəmsal İnkişaf və Nəqliyyat Nazirliyi”nin yaradılması dövlətin rəqəmsal inkişafa nə qədər ciddi yanaşdığının göstəricisidir. Biz, gənc nəsli hələ məktəb illərindən rəqəmsal savadlılıqla təmin etməliyik.
Lakin böyük texnoloji inkişafın qarşısında böyük təhlükəsizlik məsələləri dayanır. Cənab Prezidentin kiberhücumların geniş vüsət almasını xatırlatması və Kibertəhlükəsizlik Mərkəzinin yaradılması qərarı, bu məsələnin həyati əhəmiyyətini göstərir. Kibertəhlükəsizlik artıq fiziki təhlükəsizliyimiz qədər vacibdir. Bu sahədə Azərbaycan alimləri beynəlxalq tərəfdaşlarla birgə işləyərək ölkəmizin virtual məkanını gücləndirməlidirlər.
Bu texnoloji təməlin əsası Ulu Öndər Heydər Əliyev tərəfindən qoyulmuşdur. O, hər zaman elmə və inkişafa dəstək olmuş, gənclərin ən müasir sahələrdə təhsil almasını təmin etmişdir. Prezident İlham Əliyev isə bu siyasəti XXI əsrin ən qabaqcıl texnologiyalarına uyğun olaraq yeni mərhələyə yüksəldir.
Bu inkişafın sosial dayaqları isə Azərbaycanın Birinci vitse-prezidenti Mehriban xanım Əliyevanın Heydər Əliyev Fondu vasitəsilə həyata keçirdiyi layihələrdədir. Mehriban xanımın təşəbbüsü ilə gənclərin xaricdə təhsili və onların Vətənə qayıdıb rəqəmsal iqtisadiyyatımıza qatılması istiqamətindəki fəaliyyəti, Prezidentin texnoloji inkişaf strategiyasını insan kapitalı ilə təmin edir.
Bizim güclü iqtisadiyyatımız, xüsusilə də qeyri-neft sektorunun gücü, bu texnoloji sıçrayışa maliyyə zəmini yaradır. Eyni zamanda, Qarabağ və Şərqi Zəngəzurda həyata keçirilən böyük bərpaolunan enerji və geoloji kəşfiyyat layihələri də məhz texnoloji innovasiyaların köməyi ilə mümkün olur. Texnoloji üstünlük Azərbaycanın gələcək uğurlarının təminatıdır.
281 nömrəli tam orta məktəbin direktoru Dadaş Əliyev
