Bu gün müstəqil Azərbaycanın qadınları parlamentdə, icra hakimiyyəti orqanlarında, bələdiyyələrdə, elm, təhsil, incəsənət, səhiyyə sahələrində, biznes strukturlarında, idmanda, hüquq-mühafizə orqanlarında və digər sahələrdə kişilərlə bərabər vəzifələrdə çalışırlar.
Ölkəmizin birinci vitse-prezidenti Mehriban xanım Əliyevanın bütün sahələri əhatə edən fəaliyyəti nəticəsində Azərbaycan qadınlarının ölkənin ictimai-siyasi həyatında fəal iştirakına maraqları daha da artıb. Azərbaycan qadınının əzəməti bü gün dünya ictimaiyyətinə ölkəmizin birinci vitse-prezidenti Mehriban xanım Əliyevanın simasında açıq-aşkar təqdim olunur. Onun gördüyü işlər ölkəmizin ictimai-siyasi və mədəni həyatında danılmaz amildir. Milli-mənəvi dəyərlərin qorunması, mədəniyyətimizin geniş təbliği, elm, təhsil, səhiyyə və idmanın bütün sahələrinin inkişafını təmin edən bir çox layihələrin dəstəklənməsi, uşaq və gənclərin sağlam, milli-mənəvi dəyərlərə sadiq, hərtərəfli bilikərə malik vətəndaş kimi yetişməsi və Azərbaycanın beynəlxalq nüfuzunun artmasına yönələn tədbirləri həyata keçirməklə böyük layihələrin müəllifidir.
Azərbaycan qadını ölkənin inkişafında özünəməxsus yeri və nüfuzu olan vətəndaşdır. Evinin, ailəsinin qayğıları ilə yanaşı, cəmiyyətin tərəqqisini düşünən, onun üçün vaxtını ayıran, rahatlığından keçən, gecəli-gündüzlü çalışan, bəzən özünü fəda edən, zəhməti ilə cəmiyyətə xeyir verən qayğıkeş xanımdır. Torpağa, elə-obaya bağlılıq ən çətin anlarda Azərbaycan qadınının əməllərində özünü biruzə vermişdir. Tariximizin ayrı-ayrı dövrlərində yaşayıb fəaliyyət göstərmiş qadınlar müdrikliyi və işgüzarlığı ilə keçmişə parlaq səhifələr yazıblar.
Ulu Öndər Heydər Əliyevin qeyd etdiyi kimi: “Azərbaycan qadını tarix boyu öz ağılı, zəkası, namusu, qeyrəti, isməti, fədakarlığı, çalışqanlığı, mərdliyi, vətənpərvərliyi ilə, millətinə, torpağına olan hədsiz məhəbbəti və gözəlliyi ilə, Azərbaycan xalqının xüsusiyyətləri ilə tanınmışdır. Ancaq bununla bərabər, əsrlər boyu Azərbaycan qadınının üzərinə böyük zəhmətlər düşmüşdür. O zəhməti də qadın həmişə mərdliklə, cəsarətlə çəkmişdir və heç vaxt bu zəhmətdən inciməmişdir.”
Azərbaycan qadınları ölkəmizin inkişafı, qlobal dünyada mədəni-mənəvi zənginliklərimizin yaşadılması, gənc nəslin milli ideya və dövlətçilik ideallarına sədaqət ruhunda tərbiyəsi üçün bundan sonra da fəallıq nümayiş etdirəcəklər.
Ülkər Babayeva
Suraxanı RİHB-nın Əmircan qəsəbə inzibati ərazi
dairəsi üzrə nümayəndəliyinin aparıcı mütəxəssisi