Bildiyiniz kimi, üç il əvvəl Aşıq Ələsgərin adının əbədiləşdirilməsi üçün prezident İlham Əliyev iki Sərəncam imzalamışdır. Sərəncam əsasında Aşıq Ələsgərin 200 illik yubileyi dövlət səviyyəsində qeyd edildi. İkinci Sərəncam isə onun abidəsinin ucaldılması məsələsi nəzərdə tutulurdu. Bu gün şəhərimizin gözəl yerində, gözəl bir parkda Aşıq Ələsgərin abidəsi ucaldıldı.
Prezident tədbirdə çıxışı zamanı bütün Azərbaycan xalqını ürəkdən təbrik etdi. “Gün gələcək Aşıq Ələsgərin ermənilər tərəfindən dağıdılmış abidəsini bərpa edəcəyik və Ağkilsə kəndində buna oxşar mərasim keçirəcəyik. Mən əminəm ki, eyni mənzərəni Qərbi Azərbaycana qayıdış dövründə də görəcəyik. İkinci Qarabağ müharibəsi, antiterror əməliyyatı və ondan sonrakı dövr göstərdi ki, güclü iradə olan yerdə, xalqımızın əyilməz ruhu olan yerdə heç bir qüvvə bu iradənin qabağında dura bilməz. Nə qədər güclü olsaq o qədər səsimiz eşidiləcək. Antiterror əməliyyatının ildönümü ərəfəsində yenə də genişmiqyaslı şər, böhtan kampaniyası ilə üzləşdik. Bu, bizim iradəmizə heç vaxt təsir edə bilməz.”
Aşıq Ələsgər ömür boyu Azərbaycanın qədim torpağı olan Göyçə mahalında uzun ömür yaşamışdır və ömrünün son illərində torpaqlarını tərk etməyə məcbur olmuşdur. Mahalını tərk edəndə onun 97 yaşı vardır. Vətən sevgisi o qədər güclü idi ki, bütün təhlükələrə baxmayaraq üç ildən sonra öz doğma Ağkilsə kəndinə qayıtmış və bir neçə ildən sonra orada vəfat etmişdir.
1970-ci illərdə Ulu Öndər Heydər Əliyevin təşəbbüsü ilə Aşıq Ələsgərin 150 illik yubileyi qeyd edilmişdir, yubiley münasibətilə doğma Ağkilsə kəndində onun abidəsi ucaldılmışdır.
Tədbirdə iştirak edən görkəmli nümayəndələr Aşıq Ələsgərin fəaliyyəti və yaradıcılığı barədə danışdılar. O, Azərbaycan xalqının yaddaşında görkəmli şəxsiyyət, öz xalqını və Vətənini sevən insan kimi qalmışdır.
Tədbirin sonunda prezident İlham Əliyev xatirə şəkilləri çəkdirib.
Roman Səfərov
Suraxanı RİHB-nin Yeni Suraxanı qəsəbə inzibati ərazi dairəsi üzrə nümayəndəsi
