Qazaxıstan prezidenti Nursultan Nazarbayev istefa verib.
“Rubin.az” xəbər verir ki, bu barədə dövlət başçısı özü xalqa müraciətində bildirib.
“Mən prezident kimi səlahiyyətimi başa vurmaq qərarını aldım”, -deyə Nazarbayev dövlət televiziyasının canlı efirində bildirib.
“Bu il bu yüksək postu tutmağımın 30 ili tamam olur. Xalq mənə müstəqil Qazaxıstanın ilk prezidenti olmaq imkanını vermişdi”, eks-prezident qeyd edib.
Məlumat üçün bildirək ki, Qazaxıstan qanunvericiliyinə görə, prezidentin vaxtından əvvəl vəzifəsindən getdiyi halda onun səlahiyyətlərini spiker icra edir.
79 yaşlı Nursultan Nazarbayev Qazaxıstanın ilk və tək prezidenti olub. Onun hazırkı prezidentlik dövrü 2020-ci ilin aprelində başa çatacaqdı.
2007-ci ildə parlament Nazarbayevə müddətsiz bu posta təyin edilmək haqqı tanımışdı.
Qazaxıstanda sonuncu prezident seçkiləri 2015-ci ildə baş tutmuşdu. Həmin seçkilərdə Nazarbayev 97,75 faiz səs toplayaraq prezident seçilmişdi.
Ölkə qanunvericiliyinə əsasən, Nursultan Nazarbayev rəsmi titul olan “xalq lideri” sayılır. Bu status ömürlük olaraq ona prezident adından asılı olmayaraq müəyyən hökumət səlahiyyətləri verir. Bundan savayı, sözügedən titul Nazarbayev və ailəsini cinayət təqibindən azad edir.
