Vətən müharibəsi şəhidi Fəxri Məmmədovun ad günü qeyd edilib

27 iyul vətən müharibəsi şəhidi Fəxri Məmədovun doğum günüdür.

Doğum günündə Fəxri Məmmədovun əziz xatirəsi yad olunub. Şəhidin məzarı ziyarət edilib, önünə əklil qoyulub, ruhuna dualar oxunub.

“İstedadları Tanıyaq və Tanıdaq” İctimai Birliyin təşkilatçılığı ilə Sabunçu Gənclər Evində şəhidin xatirəsinə həsr olunmuş anım tədbiri keçirilib. Azərbaycan Respublikasının Dövlət Himni səsləndirildikdən sonra ölkəmizin ərazi bütövlüyü və suverenliyi naminə canını qurban vermiş şəhidlərimizin əziz xatirəsi bir dəqiqəlik sükutla yad edilib. Şəhid Fəxri Məmmədovun xatirəsinə həsr edilmiş videoçarx nümayiş olunub.

Çıxış edən “İstedadları Tanıyaq və Tanıdaq” İB-nin sədri Vüsalə Qələndərli şəhidlərin, qazilərin, müharibə iştirakçılarının şücaətindən, döyüş yolundan danışıb: Hörmətli şəhid ailələri, sizin övladınız torpaq uğrunda, Vətənin müdafiəsi, bütövlüyü uğrunda döyüşərək şəhidlik zirvəsinə yüksəlmişlər. Biz sizə minnətdarıq! Övladınızın ruhu qarşısında baş əyirik. Sizin övladınız artıq yalnız öz ailəsinə deyil, bütün Azərbaycana əzizdir, doğmadır. İki bacının tək qardaşı olan Fəxri artıq milyonlarla bacının qardaşıdır. Azərbaycanın fəxridir.

Daha sonra söz Şəhidin valideynlərinə Habil Məmmədova və Kəmalə Məmmədovaya verilib.

Şəhidin valideynləri çıxışında övladları ilə bağlı xatirələrini bölüşüb. Gələn qonaqlara təşəkkür edib. Tədbirdə şəhidin ailə üzvləri, qazilər və şəhid ailələri, sənətçilər, istedadlı gənclər, şəhidin müəllimləri, hərbçi dostları və b iştirak edib.

Tədbir əməkdar artist Gülyaz Məmmədova, şairə Cığatel İsaqızı, Xanəndə -metodist Vəsilə Quliyeva, Tarzən İntiqam Abbasovun çıxışları ilə davam edib, İstedadlı gənclərin hazırladıqları vətənpərvərlik şeirləri və mahnıları səsləndirilib.

Qeyd edək ki, Fəxri Məmmədov 2000-ci il iyulun 27-də Bakı şəhərində anadan olub.. Əslən Laçın rayonunun Şamkənd kəndindəndir. İlk təhsilini 2007-ci ildə Bakı şəhəri Cəlal Məmmədyarov adına 155 nömrəli tam orta məktəbdə almışdır. 2016-cı ildə qəbul olduğu təhsil müəsisəsində kompüter mühəndisliyi ixtisası üzrə təhsil almışdır. Fəxri Məmmədov musiqi ilə məşğul olmuş, gitarada ifa etməyi bacarırdı. Azərbaycan Ordusunun əsgəri olan Fəxri Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Cəbrayılın rayonunun azad edilməsi uğrunda gedən döyüşlərdə iştirak etmişdir. Fəxri Məmmədov sentyabr 27-də Cəbrayıl rayonun Nüzgar kəndi uğrunda gedən döyüşlər zamanı həlak olub.

Azərbaycan ərazilərinin işğaldan azad olunması zamanı döyüş tapşırıqlarını uğurla yerinə yetirdiyinə, düşmənin əsas qruplaşmalarının məhv edilməsi ilə qoşunların döyüş qabiliyyətinin qorunub saxlanılmasında fərqləndiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Fəxri Məmmədov ölümündən sonra “Cəsur döyüşçü” medalı ilə təltif edildi.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Fəxri Məmmədov ölümündən sonra “Vətən uğrunda” medalı ilə təltif edildi.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Fəxri Məmmədov ölümündən sonra “Füzulinin azad olunmasına görə” medalı ilə təltif edildi.

Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Fəxri Məmmədov ölümündən sonra “Cəbrayılın azad olunmasına görə” medalı ilə təltif edildi.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Fəxri Məmmədov ölümündən sonra “Xocavəndin azad olunmasına görə” medalı ilə təltif edildi.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Fəxri Məmmədov ölümündən sonra “Şuşanın azad olunmasına görə” medalı ilə təltif edildi.