Arif Fərman oğlu Mərdanov Azərbaycan Dövlət Su Ehtiyatları Agentliyinin (ADSEA) tabeliyindəki İri Şəhərlərin Su Təchizatı Qapalı Səhmdar Cəmiyyətinin icraçı direktoru təyin edilib. Bu təyinat İri Şəhərlərin Su Təchizatı QSC-nin Müşahidə Şurasının ilk iclasında qəbul olunub.
Qəbul edilən qərara görə, Mərdanovun təyinatı həmin qurumun publik hüquqi şəxsdən qapalı səhmdar cəmiyyətinə çevrilməsi prosesinə təsadüf edir. İclas zamanı bu çevrilmənin idarəetmənin təkmilləşdirilməsinə və fəaliyyətin daha səmərəli təşkilinə təsirinin müzakirə olunduğu bildirilir.
Arif Mərdanov 24 aprel 1970-ci ildə Bakı şəhərində anadan olub. O, Azərbaycan İnşaat Mühəndisləri İnstitutu və Azərbaycan Dövlət İqtisad Universitetini bitirib.
Mərdanov karyerası ərzində "Azərsu" ASC-də rəhbər vəzifədə çalışıb, "Su təchizatı və tullantı suları haqqında" qanunun hazırlanmasında ekspert qrupunun üzvü olub və "SOCAR"da idarə rəisi vəzifəsində fəaliyyət göstərib. O, müxtəlif zamanlarda həmkarlar ittifaqları strukturunda və TƏBİB-in Müşahidə Şurasında üzv kimi fəaliyyət göstərib.
İri Şəhərlərin Su Təchizatı QSC Bakı, Sumqayıt, Gəncə, Mingəçevir, Şirvan və Naxçıvan şəhərlərində içməli suyun təchizatı, yağış və tullantı sularının emalı və axıdılması xidmətlərini həyata keçirir.
Mənbə: az.trend.az