Zəngilan Şəhəri Günü münasibətilə Zəngilanda “Zəngilan: zamanın qanadında” adlı fotosərgi ilə yanaşı təsviri sənət üzrə ustad dərsləri təşkil olunub.
Tədbir Mədəniyyət Nazirliyi və Azərbaycan Fotoqraflar Birliyinin təşəbbüsü ilə Zəngilan Konqres Mərkəzinin dəhlizində keçirilib.
Sərgidə Elman Hüseynov, Rəsul Rəhimov, Azər İbrahimov, Siyavuş Hüseynli, Nigar Əhmədova, Hüseyn İskəndərov, Elgiz Nəbili, Zaka Soltan, Roman İsmayılov, Amira Süleyman və Mirnaib Həsənoğlunun çəkdiyi fotolar nümayiş olunub; ekspozisiyada Zəngilanın tarixi yaddaşı, təbiəti, bərpası və çağdaş görkəmi əks etdirilib.
Eyni məkanda təşkil edilən ustad dərslərində peşəkar rəssamlar Pərviz Ələkbərli və Fidan Abidovanın məsləhətləri əsasında uşaqlar Çinarlar yurdunun təbiət panoramaları, tarixi abidələri və milli rəmzlərini kətana köçürüblər.
Cəbrayıl, Qubadlı və Zəngilan rayonlarından gələn qonaqlar — Azərbaycan Respublikası Prezidentinin xüsusi nümayəndəsi Vahid Hacıyev, mədəniyyət nazirinin müavini Murad Hüseynov və rayon ictimaiyyəti təmsilçiləri — sərgi və uşaqların rəsm əsərləri ilə tanış olublar; qonaqlara nümayiş olunan əsərlər barədə məlumat verilib.
Mənbə: az.trend.az