“Göyçay İnkişaf Mərkəzi” İB-nin sədri Əzizağa Atakişiyev Birləşmiş Millətlər Təşkilatının Elm, Təhsil və Mədəniyyət üzrə (YUNESKO) Baş Direktoru, xanım Odri Azuleyə məktub ünvanlayıb. Məktubu ünvanlamaqda məqsədi hər il ənənəvi olaraq Göyçay şəhərində keçirilən Nar bayramının YUNESKO-nun Bəşəriyyətin Qeyri-Maddi Mədəni İrs üzrə Reprezentativ Siyahısına təqdim edilməsi ilə bağlıdır.
Məktubun mətnində O qeyd edib ki, Nar bayramı, narla bağlı mədəniyyət ənənələri gələcək nəslə ötürülməsi üçün təşviq edilməlidir. Bununla əlaqədar, bayramın YUNESKO-nun Bəşəriyyətin Qeyri-Maddi Mədəni İrs üzrə Reprezentativ Siyahısına təqdim edilməsini tamamilə dəstəkləyir və YUNESKO tərəfindən bu elementin tanıdılmasında köməklik göstərməsini xahiş edir.
Qeyd edək ki, Nar bayramı ilk dəfə Azərbaycan Respublikası Mədəniyyət və Turizm Nazirliyi və Göyçay rayon İcra Hakimiyyətinin birgə təşəbbüsü ilə 3 noyabr 2006-cı ildə keçirilmişdir.
Nar bayramında hər il ölkələrin Azərbaycandakı səfirləri, beynəlxalq təşkilatlarının təmsilçiləri, tanınmış elm və mədəniyyət xadimləri, yerli və əcnəbi iş adamları, Azərbaycanda təhsil alan xarici tələbələr, eləcə də Azərbaycan, Türkiyə və Rusiyanın aparıcı KİV-lərinin nümayəndələri iştirak edirlər. Bayramların keçirilməsində əsas məqsəd regionların təbliği, mədəni və iqtisadi potensialın nümayişi və turizmin inkişaf etdirilməsindən ibarətdir.
