Xarici işlər naziri Ceyhun Bayramov APA-ya bildirib ki, Azərbaycan və Ermənistan dövlət sərhədinin delimitasiyası Azərbaycan, Ermənistan və Gürcüstan sərhədlərinin kəsişdiyi nöqtədən başlayaraq şimaldan cənuba doğru aparılacaq. Nazir bu istiqamətdə razılıq və qarşılıqlı anlaşma olduğunu vurğulayıb.
Bayramov qeyd edib ki, Delimitasiya üzrə Dövlət Komissiyasının tərkibi dəyişməz qalır və komissiyaya Baş nazirin müavini Şahin Mustafayev rəhbərlik edir. Ermənistanda da müvafiq komissiyaya Baş nazirin müavini rəhbərlik edir, komissiyaların görüşləri mütəmadi keçirilir.
Nazir həmçinin bildirib ki, son dövrdə iki ölkənin komissiyaları arasında çoxsaylı görüşlər keçirilib və komissiyaların fəaliyyətini tənzimləyən sənədlər həm Azərbaycanda, həm də Ermənistanda qəbul edilib.
Ceyhun Bayramov daha spesifik məsələlərin delimitasiya komissiyalarının işi çərçivəsində müzakirə ediləcəyini və zamanla həll olunmasının gözlənildiyini söyləyib.
Mənbə: apa.az
