Venesuelanın müvəqqəti prezidenti Delsi Rodrigez ABŞ-la 25 illik neft sazişi barədə məlumat verib. O bildirib ki, saziş 17 strateji yatağı əhatə edir və neft hasilatının gündə 1,5 milyon bareli keçməsi nəzərdə tutulur.
Rodrigezin açıqlamasına görə, Venesuela neft ehtiyatlarını, mövcud infrastrukturu və işçi qüvvəsini, ABŞ tərəfi isə kapital və texnologiyanı təmin edəcək.
Mənbədə göstərilib ki, neftin bir barelinin qiyməti təxminən 65 dollar hesablanır və Venesuela hər bareldən təxminən 19 dollar gəlir əldə etməyi planlaşdırır; dövlət gəlirlərinin ümumilikdə 209 milyard dollardan çox olması proqnozlaşdırılır.
Saziş 16 faiz həcmində royalty və yataqlarda fəaliyyət göstərən şirkətlərin mənfəətinə 34 faiz vergi tətbiq edilməsini nəzərdə tutur.
Bildirilir ki, investisiyalar yeni iş yerlərinin yaradılmasına, infrastrukturun inkişafına və sanksiyalar nəticəsində zərər görmüş neft sənayesinin bərpasına imkan verəcək.
Mənbə: apa.az
