31 mart Azərbaycanlıların Soyqırımı Günü ilə əlaqədar respublikamızın hər yerində olduğu kimi, Göyçay rayonunda da anılıb.
“Rubin.az” xəbər verir ki,Martın 31 tarixində rayon rəhbərliyi, ziyalılar, ictimaiyyət nümayəndələri, əmək kollektivlərinin iştirakı ilə Göyçay şəhərindəki Şəhidlər xiyabanında Soyqırım qurbanlarının xatirəsi kompleksinin açlış mərasimi baş tutub.
Minlərlə rayon sakini soyqırımı faciəsinin qurbanlarını yad etmək üçün şəhərin Əli Kərim parkına yollanıblar.
31 mart Azərbaycanlıların Soyqırımı abidəsi önünə gül dəstələri düzüb, soyqırımı qurbanlarının xatirəsini ehtiramla yad ediblər.
Rayon icra hakimiyyətinin başçısı cənab Mehdi Səlimzadə toplantıda çıxış edərək ermənilər tərəfindən Azərbaycan xalqına qarşı yüz illər boyu həyata keçirilən soyqırımı və deportasiya siyasətindən danışıb.
M.Səlimzadə bildirdi ki, Azərbaycanın qədim və əzəli torpaqlarında “Böyük Ermənistan” yaratmaq xülyasında olan erməni millətçiləri bu ideyanı həyata keçirmək üçün ən iyrənc üsullara əl atıb, bəşəriyyət tarixində bənzəri olmayan vəhşiliklər, qətliamlar və digər qanlı cinayətlər törədiblər.
XX əsrin əvvəllərində azərbaycanlılara qarşı genişmiqyaslı qanlı aksiyalar həyata keçirən erməni daşnakları 1918-ci ilin martında və aprelin əvvəlində Bakı, Şamaxı, Göyçay, Quba, Lənkəran, Qarabağ, Naxçıvan, İrəvan və digər bölgələrdə kütləvi qırğınlar həyata keçirib, on minlərlə soydaşımızı qətlə yetiriblər.
Tədbirdə azərbaycanlıların soyqırımı ilə bağlı həqiqətlərin dünya ictimaiyyətinə çatdırılmasında ümummilli lider Heydər Əliyevin tarixi xidmətləri bir daha xatırlanıb.
Hazırda bu istiqamətdə ölkə rəhbərliyi, həmçinin Heydər Əliyev Fondu tərəfindən məqsədyönlü və davamlı iş aparıldığı diqqətə çatdırılıb. Qeyd edək ki, Ermənilərin Azərbaycanlılara qarşı törətdiyi soyqırım faciəsindən 101 il ötür.
Davud Tarverdiyev
Foto: Sahib Cəfərli
