???
Martın 19-da Bakıda Azərbaycan xalqının milli bayramı – Novruz münasibətilə ümumxalq şənliyi keçirilir.
“Rubin.az” xəbər verir ki, Azərbaycan Prezidenti İlham Əliyev və birinci xanım Mehriban Əliyeva Novruz şənliyində iştirak edirlər.
Dövlət başçısı və xanımı Bakının Fəvvarələr meydana gəliblər. Dövlət başçısını və xanımını bayram şənliyinin iştirakçıları qarşılayıblar.
Prezident İlham Əliyev sakinlərlə söhbət edib.Novruz şənliyinin iştirakçıları ilə xatirə şəkilləri çəkdirilib.
Sonra İlham Əliyev və Mehriban Əliyeva burada “Novruz” yarmarkası ilə tanış olublar.
Daha sonra dövlət başçısı və xanımı İçərişəhərə gələrək burada “Bahar qalası” festivalı ilə tanış olublar. Bahar qız prezidentə bayram xonçası təqdim edib.
Ulu Dədə Qorqud xeyir-dua verərək Novruz bayramının xalqımıza ruzi-bərəkət gətirməsini arzulayıb.
Novruz bayramının əsas personajları olan Kosa və Keçəl Prezidenti və xanımını bayram münasibətilə təbrik ediblər, dövlət başçısı ilə yumurta döyüşdürüblər.
İlham Əliyev və birinci xanım Mehriban Əliyeva “Bahar qalası” festivalı çərçivəsində yarmarka ilə tanış olublar.
Azərbaycan Prezidenti və xanımı Müasir İncəsənət Mərkəzində olublar. Dövlət başçısı və xanımı Karvansarayda İçərişəhər sənətkarlarının əl işlərindən ibarət sərgiyə baxıblar.
İlham Əliyev və Mehriban Əliyeva İçərişəhərdə sakinlərlə çay süfrəsi arxasında söhbət ediblər.
“Səma” uşaq rəqs ansamblının çıxışını izləyən dövlət başçısı və xanımı ansamblın üzvləri ilə xatirə şəkli çəkdiriblər.
Daha sonra Azərbaycan Prezidenti Qız qalasının qarşısındakı meydanda Novruz tonqalını alovlandırıb.