İranın Zahidan şəhərində 16-cı polis bölməsinə silahlı şəxslərin basqını nəticəsində bir polis zabiti öldürülüb.
Axar.az xəbər verir ki, bu barədə Zahidan şəhərinin prokuroru Mehdi Şəms məlumat verib.
Məlumata görə, səhər saatlarında bölməyə hücum edənlərdən ikisi kamikadze olub və üzərlərində olan partlayıcı maddələri partladıblar.
Prokuror gərginliyin davam etdiyini, hadisə ilə bağlı əlavə məlumat veriləcəyini bildirib.
Bəluc Fəallarının Kampaniyası isə silahlı şəxslərin bölməni ələ keçirdiyini bildirib.
İddiaya görə, cümə namazlarının qılındığı və həftəlik etiraz aksiyalarının başladığı məşhur Məkki məscidinin yaxınlığında olan polis bölməsinə gedən yollar bağlanıb, bölgəyə çox sayda qüvvələr cəlb edilib.
Sünni məzhəbli etnik bəlucların tanınmış din xadimlərindən olan Əbdülqafar Nəqşbəndi polis bölməsinə hücum edən silahlı şəxsləri bəluc xalqının fədailəri adlandırıb:
“Bu hücum bəluc xalqının fədailərinin ötən il Məkki məscidində qırğın törədən hökumət qüvvələrinə qarşı qisas əməliyyatıdır. Hökumət bölgəyə hər an daha çox qüvvə toplayıb, yeni qırğın törədə bilər. Bəluc gənclərini Məkki məscidi ətrafına toplaşaraq qırğının qarşısını almağa çağırıram”.
Rəsmi dövlət mediası səhər saatlarından başlayan atışmanın dayandığını və bölgədə sakitliyin bərqərar olduğunu iddia edir. Bəluc fəalların yaydığı videolardan isə Məkki məscidi və 16-cı polis bölməsi ətrafında atışmanın davam etdiyi görünür. Şəhərin bir çox bölgələrində küçələrin bağlandığı, silahlı və mülki geyimli məmurların şəhərə cəlb olunduğu bildirilir.
