ABŞ, Azərbaycan və Ermənistan TRIPP (Tramp Marşrutu üzrə Beynəlxalq Sülh və Rifah) layihəsinin həyata keçirilməsini sürətləndirmək məqsədilə üçtərəfli texniki planlaşdırma qruplarının fəaliyyətə başladığını açıqlayıblar, bu barədə ABŞ Dövlət Departamentinin məlumatında noyabrın 6-da üç ölkənin hökumətlərinin birgə bəyanatı qeyd olunur.
Bəyanata görə, layihənin ilkin mərhələsində nəqliyyat və elektrik enerjisinin ötürülməsi üzrə iki texniki planlaşdırma qrupunun yaradılması barədə razılıq əldə edilib.
Bəyanatda ABŞ Dövlət katibinin Avropa və Avrasiya məsələləri üzrə köməkçisi Brendan Hanrahan, Ermənistan xarici işlər nazirinin müavini Vahan Kostanyan və Azərbaycanın xarici işlər nazirinin müavini Elnur Məmmədovun bu qrupların fəaliyyətinə start verdiyi bildirilib.
Sənəddə vurğulanıb ki, əməkdaşlıq regionda uzunmüddətli sabitliyin təmin olunmasına, iqtisadi fəallığın və regional bağlantıların artırılmasına və ticarətin inkişafına xidmət edəcək.
Tərəflər layihənin bütün komponentlərinin mümkün qədər qısa müddətdə həyata keçirilməsinə sadiqliklərini təsdiqləyiblər, həmçinin sənəddə təşəbbüsün 2025-ci il avqustun 8-də qəbul edilmiş Sülh Sammiti Bəyannaməsinin əhəmiyyətini bir daha vurğuladığı qeyd olunur.
Mənbə: az.trend.az