Biləsuvar Rayon İnternat Tipli məktəb-liseyin şagirdləri etiraz aksiyası keçirib. “Rubin.az” “unikal.org”a istinadən xəbər verir ki, buna səbəb məktəbə yeni direktorun təyin edilməsi olub.
Təhsil Nazirliyinin mətbuat xidmətinin rəhbəri Cəsarət Valehov hadisə ilə bağlı açıqlama yayaraq bildirib ki, yayılmış video aksiya zamanı yox, şagirdlərin növbə dəyişməsi zamanı çəkilib:
“Video görüntü 25 aprel tarixinə aiddir və Belə ki, K. Ağayev adına Biləsuvar şəhər texniki fənlər təmayüllü internat tipli məktəb-liseyin fəaliyyəti ilə bağlı Təhsil Nazirliyinə daxil olmuş şikayətlərin araşdırılması məqsədilə nazirliyin müvafiq komissiyası mart-aprel aylarında məktəb-liseydə xidməti araşdırma aparıb, məktəb-liseyin direktoru vəzifəsini müvəqqəti icra edən Natəvan Əzizovanın fəaliyyətində ciddi nöqsanlar aşkar edilib. Bununla bağlı komissiyanın rəyinə əsasən Natəvan Əzizova barədə müvafiq intizam tənbehinin tətbiq edilməsi və məktəb-liseyə yeni direktorun təyin olunması qərara alınıb. Təhsil nazirinin əmri ilə Mübariz İbrahimov adına Biləsuvar Təhsil Kompleksində coğrafiya müəllimi vəzifəsində çalışan, habelə Təhsil Nazirliyinin dərsliklərin qiymətləndirilməsi və monitorinqi qrupunun eksperti Mehman Əliyev həmin məktəb-liseyin direktoru vəzifəsinə təyin edilib. Mehman Əliyevin məktəb kollektivinə təqdim edilməsindən bir gün əvvəl məktəbin direktor əvəzi şagirdlərin növbə dəyişməsi zamanı məktəb qarşısında toplaşmasından istifadə edərək bunu şagirdlərin etirazı kimi təqdim etməyə çalışıb.
Hazırda internat-məktəbində təlim-tərbiyə prosesi öz axarı ilə davam edir”.
