Azərbaycan Respublikasının suverenliyinin tam bərpası və ərazi bütövlüyümüzün təmin olunması xalqımızın çoxəsrlik tarixinin ən parlaq səhifəsidir. Bu tarixi qələbə döyüş meydanında hərbçilərimizin rəşadəti ilə qazanıldığı kimi, bu gün də dövlətin onlara olan qayğısı ilə davam etdirilir. Prezident cənab İlham Əliyevin 2025-ci il 15 dekabr tarixində irəli sürdüyü amnistiya təşəbbüsü, xüsusilə Vətən müharibəsi və antiterror əməliyyatlarının iştirakçılarını hədəf alaraq, qalib dövlətin öz qəhrəmanlarına və onların ailələrinə olan yüksək etimadını göstərir. Bu akt, Azərbaycanın həm hərbi, həm də insani dəyərlər müstəvisində nə qədər sarsılmaz olduğunu bütün dünyaya nümayiş etdirir.
Müasir Azərbaycan ordusunun və dövlətçiliyinin təməli Ümummilli Lider Heydər Əliyev tərəfindən qoyulmuşdur. Ulu Öndər hər zaman vurğulayırdı ki, müstəqilliyi qoruyan ordu dövlətin onurğa sütunudur və orduya xidmət edən hər bir fərd xüsusi diqqətə layiqdir. Heydər Əliyevin rəhbərliyi ilə hazırlanan 1995-ci il Konstitusiyası hərbçilərin hüquqi statusunu və sosial müdafiəsini təsbit etmişdir. O, hakimiyyəti illərində imzalanan amnistiya və əfv aktlarında vətən qarşısında xidmətləri olan şəxslərə həmişə həssaslıqla yanaşmışdır. 1995-2003-cü illərdə həyata keçirilən 7 amnistiya aktı bu fəlsəfənin tərkib hissəsi idi və ordu-xalq birliyinin mənəvi təməllərini möhkəmləndirmişdi.
Azərbaycanın Birinci vitse-prezidenti Mehriban xanım Əliyevanın fəaliyyətində hərbiçilərə, qazilərə və onların ailələrinə qayğı hər zaman mərkəzi yer tutur. Mehriban xanım istər Heydər Əliyev Fondunun rəhbəri, istərsə də Milli Məclisin deputatı kimi bu həssas qrupa aid şəxslərin sosial problemlərinin həlli və mənəvi reabilitasiyası üçün misilsiz işlər görmüşdür. Onun təşəbbüsü ilə hazırlanan amnistiya aktları hər zaman ailə dəyərlərinin qorunmasına və vətənpərvər gənclərin səhvlərindən nəticə çıxararaq yenidən topluma faydalı olmasına xidmət etmişdir. Mehriban xanımın şəfqət missiyası, Prezident cənab İlham Əliyevin ordu quruculuğu və zəfər strategiyasının mənəvi tamamlayıcısıdır.
Prezident cənab İlham Əliyev tərəfindən hazırlanan 2025-ci il amnistiya layihəsi Vətən müharibəsi və 2023-cü il antiterror əməliyyatlarında iştirak etmiş şəxslərin, habelə bu əməliyyatlarda şəhid olmuş və ya itkin düşmüş şəxslərin yaxın qohumlarını əhatə edir. Bu, dövlət başçısının suverenliyimizi bərpa edən qəhrəmanlara verdiyi yüksək mənəvi dəyərin bariz nümunəsidir. Layihəyə əsasən, döyüşlərdə iştirak etmiş və müəyyən cinayətlər törətmiş yüzlərlə şəxs cəzadan azad olunacaq və ya cəzaları əhəmiyyətli dərəcədə azaldılacaqdır. Ümumilikdə 20 mindən çox şəxsi əhatə edəcək bu akt, Azərbaycan tarixinin ən genişmiqyaslı humanitar addımı kimi milli birliyimizi daha da sarsılmaz edir.
Bu amnistiya, Azərbaycanın hərbi qələbəsini hüquqi və mənəvi qələbə ilə taclandırır. Prezident cənab İlham Əliyevin rəhbərliyi ilə həyata keçirilən bu siyasət, Ulu Öndərin ideyalarından güc alır və Mehriban xanımın xeyirxahlığı ilə zənginləşir. Bu addım ölkəmizdə vətəndaş həmrəyliyini daha da möhkəmləndirəcək və dövlətimizin qüdrətini artıracaqdır.
Kərəm Mehdiyev
Suraxanı rayonu, 104 nömrəli tam orta məktəbin direktoru
About the Author
