Azərbaycan Respublikasının Prezidenti İlham Əliyev martın 13-də XII Qlobal Bakı Forumu zamanı “Euronews” televiziyasına müsahibə verib. Dövlətimizin başçısının müsahibəsindən bir hissə martın 14-də həmin televiziya kanalında yayımlanıb.
Telekanal müxbirinin suallarına cavab verən ölkəmizin başçısı indiki dövrdə yeni dünya nizamının qurulması mərhələsinə qədəm qoyduğumuzu, lakin hələ bu prosesin transformasiya mərhələsində olduğunu bildirmiş, belə bir mərhələdə ağıllı düşüncəyə və iradəyə, eləcə də milli maraqlara cavab verən siyasətə ehtiyac olduğunu bildirmişdir. Cənab Prezident qeyd etmişdir ki, “ birincisi, hər bir ölkə özünün daxili işlərinə və daxili imkanlarına daha çox diqqət ayırmalı, hər hansı bir yardıma və hətta beynəlxalq hüquqa arxalanmamalıdır. Beynəlxalq hüququn selektiv tətbiqinin qurbanı olan Azərbaycanın gələcəyini daxili resurslar hesabına qurması baxımından böyük təcrübəsi var. İkincisi, gələcək üçün vacib məsələlərdən biri odur ki, ölkələr beynəlxalq təsisatlar çərçivəsində fəaliyyətə deyil, ikitərəfli münasibətlərə daha çox əhəmiyyət verəcəklər.”
Qlobal Bakı Forumunun əhəmiyyətini qeyd edən cənab İlham Əliyev bu forumda dünya çapında kifayət qədər tanınan siyasi xadimlərin iştirak etdiyini, müxtəlif və ziddiyyətli fikirlərin olduğunu və nəhayət, bu ziddiyyətlərdən ortaq ideyaların və fikirlərin, yanaşmaların olacağını qeyd etmişdir.
Dünya nizamının artıq olmadığını, beynəlxalq hüququn işləmədiyini, alışdığımız oyun qaydalarının dəyişdiyini bildirən ölkə başçısı indiki mərhələdə əsas diqqətin yönəldiləcəyi sahələri konkretləşdirərək söyləmişdir: “Bizim yanaşma ondan ibarətdir ki, biz qlobal nizamı olduqca düzgün qiymətləndiririk. Milli maraqlarımız məsələsində biz heç kəsə və ya heç bir təsisata arxalanmamışıq. Olsun Rusiya-Ukrayna müharibəsi, yaxud Yaxın Şərqdəki hadisələr və Afrikadakı gərginlik – hər bir ölkə anlamalıdır ki, o, öz taleyinin sahibidir.
Onlar bunu nə qədər tez başa düşsələr, bu, onlar üçün bir o qədər də yaxşı olar. Çünki əgər siz həmişə kiminsə yardımına bel bağlasanız, birincisi, bu, sizi zəiflədəcək, ikincisi, bu yardımın daimi olacağına dair heç bir zəmanət yoxdur, üçüncüsü də siz suverenliyinizin bir hissəsini itirmiş olursunuz. Çünki əgər siz həmişə kimdənsə asılısınızsa və həmişə kimdənsə yardım istəyirsinizsə, onda bir gün gələcək, həmin şəxs gəlib sizdən hesabat istəyəcək.”
Cənubi Qafqaz regionunda sülhün daimi və dayanıqlı olmasında bir dövlət kimi Azərbaycan Respublikasının maraqlı olduğunu və eyni zamanda siyasi sabitliyin vacibliyini önə çəkən cənab İlham Əliyev bildirib ki “ən azından Cənubi Qafqaz respublikaları arasında fəal təmaslar var idi. Yəni, biz belə bir təcrübəyə malikik və sadəcə, bunu nəzərimizdə saxlamalıyıq. Bu regionla əlaqədar biz geosiyasi transformasiyalar ilə bağlı geridə qalmamalı, diqqətimizi regional problemlər və regional fürsətlər üzərində cəmləşdirməliyik.”
Qarabağ münaqişəsinin beynəlxalq hüquq, tarixi ədalət əsasında həllini tapmış yeganə münaqişə olduğunu bildirən cənab İlham Əliyev qeyd edib ki, bu ilk növbədə Azərbaycanın öz gücünə, öz mübarizəsinə arxalanmasının nəticəsində mümkün olmuşdur.
Cənab Prezident qeyd etmişdir ki, atəşkəs razılaşmaları heç də sülh sazişləri ilə sonuclanmır. Bunun üçün real şərait və zəmin olmalıdır. Müharibənin yenindən başlamayacağına zəmanət yoxdur: “Bir vaxtlar demək olar ki, otuz il ərzində bizdə – Azərbaycan və Ermənistan arasında atəşkəs razılaşması var idi. Bu razılaşmaya 1994-cü ilin yazında nail olunmuşdur. Lakin bu, müharibənin sona çatması demək deyildi. Sadəcə, transformasiya baş vermişdir və müharibə yalnız sülh sazişi imzalananda bitir.
Hətta indiki dövrdə, İkinci Qarabağ müharibəsinin bitməsindən beş il keçməsinə baxmayaraq, bizim Ermənistanla sülh müqaviləmiz yoxdur. Bəli, sakitlikdir, itkilər yoxdur və bu da bugünkü vəziyyətin böyük üstünlüyüdür. Lakin sülh sazişi imzalanana qədər burada sabitlik olmayacaq.”
Vaşinqtonda- Ağ evdə baş verən hadisələrin geostrateji dəyişikliklərin mənbəyi olduğunu diqqətə çatdıran dövlətimizin başçısı bildirib ki, indi bütün dünyanın taleyi Ağ evdə qəbul edilən qərarlardan asılıdır. Bu da qlobal geosiyasi dəyişikliklərin mənbəyidir və artıq proses başlamışdır.
Sonda Bakı Forumunun əhəmiyyətinə bir daha toxunan cənab Prezident demişdir: “Mənim çıxışıma nəzər salsanız görərsiniz ki, mən baş verənlərlə bağlı çox nikbin əhvali-ruhiyyədəyəm. Çıxışımda dediyim kimi, biz ABŞ-ın əvvəlki administrasiyası və Azərbaycan arasında münasibətlərin pisləşməsindən məyusluq hissi keçirmişdik. Onların mövqeyi bizim milli maraqlarımıza ədalətsiz yanaşmadan ibarət idi. Buna görə biz Tramp administrasiyası dövründə ABŞ ilə münasibətlərimizin və güclü tərəfdaşlığımızın yenidən qurulmasına çox nikbin baxırıq.”
Cənab Prezidentin müsahibəsində səslənən fikirlər onu deməyə əsas verir ki, Azərbaycan bundan sonra da milli maraqlara xidmət edən siyasətini davam etdirəcək, regionda sülhün bərpası və sabitlik üçün lazım olan addımları atacaqdır. Eyni zamanda milli maraqlar ön planda olmaqla bəşəri dəyərlərə üstünlük verilməsi xətti davam etdiriləcəkdir.
Arzu Miriyev
Suraxanı rayonu, 65 nömrəli tam orta məktəbin direktoru