Hər bir xalqın gələcəyi onun yetişməkdə olan nəslinin fiziki sağlamlığından, intellektual səviyyəsindən və vətənpərvərlik ruhundan asılıdır. Azərbaycan xalqı üçün 1990-cı illərin əvvəlləri ağır sınaqlar dövrü idi. Müstəqilliyin ilk illərində ölkədə hökm sürən xaos, torpaqlarımızın işğalı və daxili çəkişmələr ən çox gənclərin taleyinə mənfi təsir göstərirdi. Belə bir tarixi məqamda – 1993-cü ildə Ulu Öndər Heydər Əliyevin hakimiyyətə qayıdışı ilə Azərbaycan gəncliyi üçün yeni bir inkişaf erasının təməli qoyuldu. Ümummilli Lider gəncləri “Azərbaycanın sabahı” adlandıraraq, onlara yönəlik siyasəti dövlət quruculuğunun prioritet istiqaməti elan etdi.
Azərbaycan Gəncləri Gününün təsis edilməsi təsadüfi bir tarixə söykənmir. Bu günün əsası 1996-cı il fevralın 2-də müstəqil Azərbaycanın tarixində ilk dəfə keçirilən Azərbaycan Gənclərinin I Forumu ilə qoyulmuşdur. Heydər Əliyev həmin forumda gənclər qarşısında duran strateji vəzifələri müəyyənləşdirdi və onlara dövlət idarəçiliyində etimad göstərdi.
Azərbaycan Gəncləri Gününün təsis edilməsi təsadüfi bir tarixə söykənmir. Bu günün əsası 1996-cı il fevralın 2-də müstəqil Azərbaycanın tarixində ilk dəfə keçirilən Azərbaycan Gənclərinin I Forumu ilə qoyulmuşdur. Heydər Əliyev həmin forumda gənclər qarşısında duran strateji vəzifələri müəyyənləşdirdi və onlara dövlət idarəçiliyində etimad göstərdi.
Gənclər Gününün təsis edilməsi sadəcə simvolik deyildi; bu, genişmiqyaslı islahatların tərkib hissəsi idi. 1994-cü ildə Gənclər və İdman Nazirliyinin yaradılması gənclərlə işin dövlət səviyyəsində mərkəzləşdirilməsinə xidmət edirdi. Ardınca qəbul olunan “Gənclər siyasəti haqqında” Qanun bu sahədə möhkəm hüquqi baza formalaşdırdı. Ulu Öndərin “Bizim gələcəyimiz gənclərdir” fəlsəfəsi əsasında istedadlı gənclər üçün “Qızıl kitab” təsis edildi, onlara Prezident təqaüdləri verildi və dövlət hesabına xaricdə təhsil imkanları açıldı.
2003-cü ildən sonra Prezident İlham Əliyev gənclər siyasətini yeni bir müstəviyə – keyfiyyət mərhələsinə yüksəltdi. “2015-2025-ci illərdə Azərbaycan gənclərinin İnkişaf Strategiyası” və ardıcıl qəbul edilən Dövlət Proqramları göstərdi ki, dövlətin əsas məqsədi neft kapitalını insan kapitalına çevirməkdir.
2 Fevralın və gənclər siyasətinin ən böyük tarixi əhəmiyyəti 2020-ci ilin 44 günlük Vətən müharibəsində özünü göstərdi. Məhz müstəqillik dövründə, Heydər Əliyev məktəbinin və İlham Əliyev dövrünün vətənpərvərlik ruhunda yetişən gəncləri torpaqlarımızı işğaldan azad etdilər. Ali Baş Komandanın vurğuladığı kimi, bu qələbəni qazananlar məhz son 20 ildə formalaşan, milli ruhla böyüyən gənclər idi. Bu, Azərbaycan gənclər siyasətinin sadəcə kağız üzərində deyil, real həyatda, döyüş meydanında və diplomatiyada nə qədər effektiv olduğunun sınağı idi.
Bu bayram gənclər üçün həm də bir hesabat günüdür. Hər il fevralın 2-də gənclər öz nailiyyətlərini təhlil edir, gələcək planlarını cızırlar. Dövlət isə öz növbəsində gənclərin mənzil şəraitinin yaxşılaşdırılması (Güzəştli mənzil layihələri), asudə vaxtının təşkili (Gənclər Evləri) və təhsil islahatları ilə bu prosesə dəstək verir. Ulu Öndərin dediyi kimi: “Mən gənclərə həmişə inanmışam, bu gün də inanıram”. Bu inam bu gün Azərbaycanın hər bir kəndində, şəhərində inşa olunan müasir məktəblərdə, idman komplekslərində və gənclərin parlaq gözlərində əks olunur.
Azərbaycan Gəncləri Gününün təsis edilməsi xalqımızın milli-mənəvi dəyərlərinin qorunması və dövlət müstəqilliyimizin əbədiliyinin təminatıdır. Bu gün Azərbaycan gənci həm texnologiya əsrinin tələblərinə cavab verən innovativ fərd, həm də öz tarixinə, kökünə bağlı sadiq vətəndaşdır. 2 Fevral tarixi bizə xatırladır ki, güclü Azərbaycanın təməli sağlam və savadlı gənclik üzərində qurulub. Bu siyasət davam etdikcə, Azərbaycan bayrağı dünyanın ən yüksək zirvələrində dalğalanmağa davam edəcəkdir.
Hüseynova Könül
Suraxanı rayonu, 114 nömrəli tam orta məktəbin direktoru
About the Author
