Qırğızıstan Nazirlər Kabinetinin sədri Uluğbek Maripov Qırğızıstan-Türkiyə Hökumətlərarası Əməkdaşlıq Komissiyasının X iclasında iştirak etmək üçün Bişkekə gələn Türkiyənin vitse-prezidenti Fuat Oktayla görüşüb.
AZƏRTAC Qırğızıstan Nazirlər Kabinetinin mətbuat xidmətinə istinadla xəbər verir ki, görüşdə siyasi, ticari-iqtisadi, sosial-humanitar və digər sahələrdə əməkdaşlığın daha da inkişafı məsələləri müzakirə olunub.
U.Maripov bildirib ki, Qırğızıstan Türkiyəni strateji tərəfdaş kimi qəbul edir. Bu il iki ölkə arasında diplomatik münasibətlərin qurulmasının 30 ili tamam olub. Bu müddətdə bir çox layihə həyata keçirilib. Nazirlər Kabinetinin sədri Bişkekdə təmənnasız olaraq Qırğızıstan-Türkiyə xəstəxanasının tikintisi və fəaliyyətinə görə, həmçinin bu günlərdə humanitar yardım kimi 150 min doza vaksin göndərdiyi üçün dost ölkəyə minnətdarlığını bildirib.
Fuat Oktay ölkələr arasında orta və kiçik layihələrin həyata keçirilməsi üçün İnvestisiya Fondunun yaradılmasını təklif edib. Vitse-prezident deyib ki, Türkiyə ilə Qırğızıstan arasında əmtəə mübadiləsi həcminin 1 milyard dollara çatdırılması zamanın tələbidir və bu istiqamətdə fəaliyyət gücləndirilməlidir.
