“Hakimiyyət müxalifətə dəfələrlə dialoq təklif edib, amma görünür, onların mahiyyət üzrə deməyə sözü yoxdur”.
Modern.az xəbər verir ki, bunu Ermənistan parlamentində spiker Alen Simonyan deyib.
“Müxalifətin mitinqləri onların hüququdur, baxmayaraq ki, aqressiyaya yol verirlər, buna yaxşı yanaşmaq olmaz”.
Spiker əlavə edib ki, ciddi daxili siyasi gərginlikdən danışmaq yersizdir.
“Hakimiyyət dəfələrlə təkrarlayıb ki, əməkdaşlığa hazırdır, baş nazir də müxalifətlə görüşməyə, daxili və xarici siyasətlə bağlı təkliflərini dinləməyə hazırdır. Amma onlar bu cür görüşləri rədd edirlər – mən şübhələnirəm, çünki deməyə sözləri yoxdur. Onlar Qarabağı xilas etmək üçün küçələrə çıxdıqlarını deyəndə, bunu necə etmək istəyirlər? Bunun üçün nə təklif edirlər və özləri vaxtında nə ediblər?”, – Simonyan bildirib.“Əgər deyirlərsə ki, Paşinyan danışıqlar aparmamalıdır, o zaman sual yaranır ki, bəs kim aparmalıdır: Robert Köçəryan, Artur Vanetsyan və ya başqası, onda sual yaranır – hansı əsasla?”,
Spiker qeyd edib ki, müxalifətin hərəkətləri ya baş nazirin mühüm görüşləri (Rusiya və ya Avropa İttifaqı liderləri ilə), ya da sərhəddə baş verən insidentlərlə üst-üstə düşür. Simonyan əlavə edib ki, bu, mütəmadi olaraq təkrarlandığı üçün təsadüf ola bilməz.
Mitinqlərdə polisin hərəkətləri ilə bağlı sualı cavablandıran Simonyan deyib ki, onun fikrincə, “bir-iki hal istisna olmaqla” asayişi təmin edən qüvvələr özlərini normal aparıblar. Eyni zamanda o, jurnalistlərdən “polis nümayişçiləri döydü” kimi ifadələr işlətməməyi xahiş edib.