Nazirlər Kabineti yanında Operativ Qərargahın müvafiq qərarına əsasən martın 6-dan Azərbaycanda karantin rejimi yumşaldılıb.
Qərara uyğun olaraq, dövlət orqanlarında (qurumlarında) vətəndaşların yerində qrup və fərdi qaydada qəbuluna, dini ritual xidmətlərinin, eləcə də mərasim zallarında, çadırlarda və digər qapalı məkanlarda yas mərasimlərinin təşkilinə və keçirilməsinə, bütün kütləvi tədbirlərin, o cümlədən idman tədbirlərinin keçirilməsinə, ictimai iaşə obyektlərində qəlyan avadanlıqlarından istifadəyə, masaj xidmətlərinin göstərilməsinə və sərnişinləri qarşılayan və yola salan şəxslərin hava limanının terminalına girişinə icazə verilib.
Karantin rejiminin yumşaldılmasının əhəmiyyəti barədə Modern.az-a danışan iqtisadçı ekspert Natiq Cəfərli bildirib ki, yeni qərar bəzi xidmət sahələrində dövriyyənin artmasına səbəb olacaq:
“Bu həm əyləncə mərkəzləri, həm ictimai iaşə obyektləri, həm də xidmət sahəsi ilə bağlıdır. Düşünürəm ki, məhdudiyyətlərin aradan qaldırılması iqtisadi aktivliyə müsbət təsir göstərə bilər”.
Ekspertin fikrincə, bundan sonrakı addımlarda bütün məhdudiyyətlərin, o cümlədən COVID-19 pasportlarının ləğvi gündəmə gəlməlidir:
“Məncə, artıq bunun heç bir mənası yoxdur. Ümid edirəm ki, Novruz bayramından sonra, təxminən aprel ayından bütün məhdudiyyətlər aradan qaldırılmalıdır. Belə olsa, daha yaxşı nəticə verər”.
“Düzdür, xüsusi karantin rejimi may ayının birinə qədər uzadılıb. Amma Nazirlər Kabineti yanında Operativ Qərargahın xüsusi karantin rejimini ləğv etmək səlahiyyəti var. Ümumilikdə isə doğru istiqamətdə gedilir. Yəni bu addımlar iqtisadi aktivliyə kömək edəcək.
Bir sıra Avropa ölkələrində olduğu kimi, bütün məhdudiyyətlərin tamamilə aradan qaldırılması biznes fəaliyyətinin canlanmasına təkan verə bilər” – deyə N.Cəfərli vurğulayıb.