Kürdəmir sakini qonşusunu öldürüb, izi itirmək üçün meyitini kanala atıb.
“Qafqazinfo” xəbər verir ki, Baş Prokurorluq və DİN-in birgə yaydığı birgə məlumata əsasən, 1997-ci il təvəllüdlü Əlyarov Tərxan Rüstəm oğlunun 22 sentyabr 2018-ci ildə qəsdən öldürülməsi ilə bağlı ittihama yeni maddələr əlavə olunub. Müəyyən edilib ki, Rafael Cəfərov Kürdəmir rayonu, Atakişili kəndində yaşayan qonşusu Tərxan Əlyarov ilə mübahisə zamanı ona yumruqla güclü zərbə vurub, daha sonra deşici-kəsici alətlə zərbələr endirib. Tərxan Əliyarovun öldüyünə əmin olduqdan sonra cinayəti gizlətmək məqsədilə onun meyitini təxminən 4 metr dərinliyindəki su kollektoruna atıb. Daha sonra bıçağı və Tərxan Əlyarova məxsus iki ədəd mobil telefonu kanala atıb.
Kollektora baxış keçirilərkən üzərində xətti sınıq olan bir ədəd kəllə və 7 ədəd qabırğa skelet sümükləri aşkar olunub. Ekspertiza zamanı sümüklərin Tərxan Əlyarova məxsus olması müəyyən edilib. Eyni zamanda su kanalından götürülən bıçağın ekspertizası zamanı cinayətin məhz həmin alətlə törədilməsi müəyyən olunub.
Toplanmış sübutlar əsasında Rafael Cəfərova Cinayət Məcəlləsinin 120.2.9 (təqsirkar şəxs üçün aşkar surətdə köməksiz vəziyyətdə olan adamı öldürmə), 120.2.10 (təkrarən qəsdən adam öldürmə) və 177.2.5-ci (zərərçəkmiş şəxsin üzərindən, cibindən, çantasından və ya digər əl yükündən çıxarılmaqla oğurluq) maddələri ilə yenidən ittiham elan edilib.
İstintaq-əməliyyat tədbirləri davam etdirilir.
