Azərbaycan yeni mühəndislik möcüzəsini yaratmağa başlayıb. Toğanalı-Kəlbəcər yolunda uzunluğu 12 km-ə yaxın tunel tikiləcək.
Bu, Azərbaycanda və regionda ən uzun tunel yolu olmaqla yanaşı dünyada ilk 20 tuneldən biri olacaq. 2 yan-yana qazılan tunellərin tam olaraq 4 il ərzində tikilərək istifadəyə verilməsi planlaşdırılır. Bu uzunluqda tunellərin inşa edilməsi və idarə edilməsi kifayət qədər çətin bir prosesdir. Tunelin biri 2 zolaqlı olmaqla gedən, digər 2 zolaqlı tunel gələn avtomobillərin hərəkəti üçün nəzərdə tutulur. Tunellərin giriş və çıxış hissəsində idarə məntəqəsi olacaq.
Tunelin içərisində quraşdırılacaq kameralar vasitəsi ilə kor nöqtələri belə idarə məntəqəsindən nəzarətdə saxlamaq mümkün olacaq. Hər iki tunel arasında keçidlər olacaq ki, bunun nəticəsində xüsusi texniki vasitələr bir tuneldən digər tunelə daha operativ şəkildə keçid edə biləcəklər. Tunellərin içərisində hər 150-200 metrdən bir rabitə vasitələri qoyulacaq. Bunun nəticəsində tunel içərisində qəza və ya fos major hallarda sürücülər idarə məntəqəsi ilə rahat və operativ əlaqə yarada biləcəklər. Eyni zamanda həm giriş həm çıxış hissədə 7/24 operativ xidmət maşınları olacaq. Qəza, yanğın və digər hallara bir neçə dəqiqə ərzində müdaxilə etmək imkanı olacaq. Əgər tunellərin birində fos major hal olarsa nəqliyyatın hərəkəti dayanmayacaq. Xüsusi texniki vasitələrlə digər tunelərdə 1 gedən və 1 gələn hərəkət zolağı ilə nəqliyyatın hərəkəti təmin ediləcək. Sürət aşağı düşəcək ancaq hərəkət kəsilməyəcək.
Toğanalı-Kəlbəcər tuneli ilin istənilən fəsilində və istənilən hava şəraitində hərəkəti təmin edəcək. Eyni zamanda tunelin tikilməsi bu yoldan istifadə edən sürücülərin xərclərini azaldacaq və onların daha təhlükəsiz mənzil başına çatmalarına şərait yaradacaq.
