Türkiyədə seçkilər başladı – İçkiyə, silaha qadağa, toylara vaxt qoyuldu

Bu gün Türkiyədə bələdiyyə seçkiləri keçirilir.

Ali Seçki Komissiyasının (YSK) qərarına əsasən Adıyaman, Ağrı, Artvin, Bingöl, Bitlis, Diyarbəkir, Elazığ, Ərzincan, Ərzurum, Qaziantep, Giresun, Hakkari, Qars, Malatya, Kahramanmaraş, Mardin, Muş, Ordu, Rizə, Siirt, Sivas, Trabzon, Tunceli, Şanlıurfa, Van, Bayburt, Batman, Şırnak, Ərdahan, İğdır və Kilis şəhərində səsvermə prosesi başlayıb.

Bu ərazilərdə səsvermə yerli vaxtla saat 16:00-da başa çatacaq. Digər ərazilərdə isə işlər saat 17:00-da yekunlaşacaq.

Bələdiyyə seçkilərində 57 milyon 58 min 636 seçici səs vermə hüququndan istifadə edəcək.

Bu gün seçkilərlə əlaqədar olaraq Türkiyədə bir sıra qadağalar qoyulub. Belə ki, Səhər saat 06:00-dan gecə saat 00:00-dək alkoqollu içkilərin satılması, istifadəsi qadağandır. Səsvermə müddətində bütün kafelər, əyləncə məkanları bağlı olacaq, restoranlarda yalnız yemək veriləcək.

Bundan başqa, bu gün nəzərdə tutulmuş toylar saat 18:00-dan tez başlaya bilməz. Məclis keçirənlər içki qadağasına əməl etməlidir.

Polis və təhlükəsizlik orqanlarının işçilərindən başqa kimsə şəhər, kənd və ya qəsəbələrdə silah gəzdirə bilməz.

Radio və televiziyalarda isə 18:00-21:00-da yalnız YSK tərəfindən seçkilərlə bağlı xəbər və məlumatlar yayımlanacaq. Efirlər saat 21:00-dan sonra sərbəst fəaliyyətə keçəcək.(Qafqazinfo)